El PSOE pon difícil l’usu de les llingües oficiales nel Senáu

El PSOE quier que namás se falen les llingües oficiales dientro del Senáu nel alderique de les mociones, valtando asina coles aspiraciones de les formaciones nacionalistes.

Asina lo recueye güei’l diariu ‘Públicu’, que diz que’l PSOE-yos unvió a los senadores nacionalistes que puxaron pol emplegu del catalán, el gallegu y el vascu na Cámara alta.

El diariu afirma que los socialistes refuguen les lingües oficiales que nun seyan el castellán en toles actividaes del Plenu y nes comisiones, amás de les sesiones de control al Gobiernu, “pa nun restar importancia al alderique pola reacción de la derecha”, colo que Zapatero enxamás sentirá otra llingua que nun seya’l castellán.

La propuesta socialista tamién llenda’l so usu al Senáu, impidiendo usar otros idiomes dientro del Congresu, y según recueye ‘Públicu’ paez que ye una propuesta de máximos. Al empar, pa financiar les traducciones, el PSOE diz que les autonomíes tendrán qu'ufrir funcionarios de los sos parllamentos, cuando namás el Parllamentu vascu ye billingüe, el catalán y el gallegu furrulen dafechu nel so idioma.