Ban Ki Moon alerta del riesgu de guerres por mor de la seca

El secretariu xeneral de la ONX alertó que la seca, la fame y la probitú "amenaza con desencadenar tensiones sociales" que puen orixinar migración involuntaria, inestabilidá y conflictos.

Con motivu del Día Mundial de la Llucha contra la Desertificación y la Seca, que se celebra esti xueves, Ban Ki Moon señaló que la vulnerabilidá humana, la ecolóxica y la social van uníes con singular intensidá y simetría nes zones árides del planeta.
  
"El cambiu climáticu nun va facer más qu'incrementar toes eses presiones", añadió'l secretariu xeneral, al tiempu que recuerda que más de 1.000 millones de persones probes y vulnerables viven nes zones árides del planeta, polo que les acciones dirixíes a algamar los Oxetivos de Desarrollu del Mileniu "zarapiquen con dificultaes particulares" y tán quedando atrasaes.
  
Amás, esplicó que casi les tres cuartes partes de les zones de llenda de ganáu muestren síntomes de desertificación, dao que mientres los últimos 40 años, cerca d'un terciu de les tierres cultivables del mundu dexaron de ser granibles y, en munchos casos, quedaron abandonaes.
  
Por esti motivu, recuerda que nel Añu Internacional de la Diversidá Biolóxica les tierres árides son zones d'enorme productividá y diversidá biolóxica, porque'l 30 por cientu de los cultivos que se consumen en tol mundu proceden, precisamente, de les zones árides.  
  
Ban calcó tamién en que la diversidá biolóxica del suelu d'eses zones desarrolla "un papel decisivu" na tresformación del carbonu atmosférico en carbonu orgánico, porque les tierres grebes son la mayor reserva de carbonu orgánico del planeta.
  
D'otru llau, destacó que la protección y la restauración de les zones árides permiten avanzar en "munchos frentes coles mesmes", porque, con  ello, refuérzase la seguridá alimentaria, faise frente al cambiu climáticu, ayúdase a los probes a adquirir más control sobre'l so destín y impúlsase'l progresu hacia'l llogru de los Oxetivos de Desarrollu del Mileniu.
  
"Nesti día, reafirmemos el nuesu compromisu na llucha contra la desertificación y la degradación de les tierres y nel amenorgamientu de los efectos de la seca, y reconozamos que cuidar de los nuesos suelos equival a cuidar de la vida na Tierra", esixó.

A 25 cm de la estinción
  
Pela so parte, el secretariu executivu de la Convención de les Naciones Xuníes contra la Desertificación (CNULD), Luc Gnacadja, calcó en qu'ente 18 y 25 centímetros de la capa superficial del suelu ye "tolo que s'interpón" ente los habitantes de la Tierra y la estinción.
  
Coles mesmes, considera qu'esto nun supón namás falar sólo d'alimentu, sinón que tolo que vive y crez nesti "llendáu y irremplazable recursu" caltién a los homes "protexíos", "caltién" la llimpieza de l'agua y del aire, fai que'l suelu se caltenga fértil y contribúi a rexenerar l'alma humana.
  
"Acabamos d'empezar a entender cómo les minúscules formes de vida son a caltener la productividá del suelu y d'algamar l'óptimu equilibriu del mediu ambiente", apuntó Gnacadja.
  
De la mesma manera, destacó'l papel de los microorganismos del suelu, que constitúin la mayor parte de la biomasa terrestre y superen en númberu a toles especies de la fauna, y lo "vitales" que son el so funciones pa enfrentar la xestión medioambiental, el cambiu climáticu y el desarrollu del ser humanu.
  
D'otru llau, recordó que los microorganismos que viven na tierra ofrecen una "amplia gama de servicios al ecosistema" como la fixación de nitróxenu, el control de los procesos de descomposición y de plagues, la polinización, la retención de la humedá del suelu, drenaxe, secuestru de carbonu y reciclaxe de residuos, asina como'l papel que xueguen na regulación del clima. "Un suelu sanu pue favorecer l'incrementu de les agües", añadió.
  
"Meyorar los suelos nun llugar meyora la vida en toes partes" ye'l lema d'esti añu. Trátase de dirixir la salú del suelu hacia onde tendría d'apuntar; esto ye, hacia la base mesma de la nuesa sobrevivencia y bienestar", acabó.

secciones: