Premiu Cooperación Internacional a los tresplantes

The Transplantation Society y la Organización Nacional de Tresplantes son les galardonaes col Premiu Príncipe d'Asturies de Cooperación Internacional 2010.

Asina lo fixo públicu güei n'Uviéu'l Xuráu encargáu de la so concesión. Esta candidatura foi propuesta por Enrique Moreno, Premio Príncipe d'Asturies d'Investigación Científica y Técnica 1999.
Ambes instituciones destaquen pol so determinante llabor nel establecimientu de los principios médicu y éticu que rixen los procesos clínicos y la investigación científica rellacionada colos tresplantes.  
  
The Transplantation Society (TTS) creóse en 1966 mientres la celebración d'una conferencia sobre tresplantes de texíos humanos entamada pola Academia de Ciencies de Nueva York. Un añu dempués, la Sociedá celebró en París el so primer Congresu Internacional, que dende entós se celebra cada dos años.
  
Esti añu, con más de 4.500 miembros en tol mundu, ye la organización internacional que lidera tolos aspectos -médicos, farmacológicos, formativos y d'investigación- referentes al tresplante humanu. La Sociedá foi'l foru nel que cientos de médicos y investigadores de tol mundu compartieron resultaos y descubrimientos, debatieron hipótesis científiques y nuevos tratamientos y acordaron la formulación de definiciones y conceptos esenciales pal progresu de los tresplantes.
  
Ye responsabilidá de la TTS establecer los principios que dirixen la práctica clínica, asina como'l desarrollu de programes avanzaos de formación y la promoción de los estándares éticos pa los cuidaos clínicos y la investigación científica.
 
Oposición al comerciu d'organos

Ente ellos destaquen la firme oposición de la Sociedá a la comercialización d'órganos tresplantables, fixada hai más de 20 años, y al usu d'órganos procedentes de persones executaes, primando'l principiu fundamental de que los órganos y texíos tienen que ser donaos llibremente y sin coacción.
  
Coles mesmes, la Sociedá tamién considera una violación de los principios éticos el fenómenu actual conocíu como "turismu de tresplante" -persones que viaxen a países en víes de desarrollu pa consiguir un órganu-.
  
Los congresos internacionales son el foru nel que se presenten toles meyores científiques rellacionaes colos tresplantes humanos y que tienen el so reflexu na publicación Transplantation Proceedings, creada al efectu en 1968.
  
D'otru llau, Transplantation ye la revista oficial de la Sociedá, que, con dos númberos al mes, ye la más citada -más de 20.000 cites añales- y la más influyente nel so campu. Transplant Infectious Disease, Transplantation Immunology y Geno-Transplantation son otres publicaciones de la Sociedá.
  
En collaboración permanente cola Organización Mundial de la Salú, tamién integró baxo'l so organigrama a otres asociaciones especializaes como la Cell Transplant Society, la International Pancreas and Islet Transplant Association, la International Society for Organ Donation and Procurement y la Intestinal Transplatation Association.

Meyorar la calidá de vida

Pela so parte, La Organización Nacional de Tresplantes (ONT), creada en 1980, ye un organismu coordinador de carácter técnicu, perteneciente al Ministeriu de Sanidá y Consumu.
  
Siguiendo los principios de cooperación, eficacia y solidaridá, tien como finalidá la coordinación de les actividaes de donación, estracción, preservación, distribución, intercambiu y tresplante d'órganos, texíos y célules nel conxuntu del Sistema Sanitariu Español, pa facer posible la realización del máximu númberu de tresplantes col fin de meyorar la calidá de vida de los pacientes.
  
La so principal función ye actuar de ponte ente les autoridaes sanitaries llocales, nacionales y europees, los profesionales sanitarios, los distintos axentes sociales implicaos na donación y el tresplante y la población xeneral.
  
La ONT desarrolla, ente otres, les siguientes actividaes: xestión de les alarmes de donación, caltenimientu y actualización de les llistes d'espera, cooperación n'intercambios renales, collaboración na coordinación d'entrada y salida d'órganos, rexistru de donantes, receptores y tresplantes d'órganos, texíos y proxenitores hematopoyéticos, asina como la recepción de solicitúes de sovenciones, recoyida de datos sobre l'actividá estractora y tresplantadora, información polo xeneral y cursos de formación siguida y de posgráu a los profesionales del tresplante.
  
Amás, la ONT collabora con otres entidaes nacionales y internacionales y publica de vez en cuando una revista y una memoria d'actividaes. Nel 2007 la ONT punxo en marcha'l Rexistru Mundial de Tresplantes, diseñáu y desarrolláu en collaboración cola Organización Mundial de la Salú, que tien sede n'España. Esti Rexistru ye la plataforma d'información pública más completa en materia de tresplantes, procedente de 98 países y no referente a más de 5.000 millones de persones, lo que supón el 82 por cientu de la población mundial.