El Gobiernu del Estáu aprueba la reforma llaboral

El decretu sobre reforma llaboral aprobáu pol Conseyu de Ministros yá inclúi dalgunes de les aportaciones que los Grupos Parlamentarios treslladaron al Executivu.

En rueda prensa al términu del Conseyu de Ministros, De la Vega indicó que, amás de los nuevos "criterios" incluyíos yá nel documentu, el testu va sufrir nuevos cambios "al tresformase en proyeutu de Llei", tal como ta previstu de cara a la so tramitación en sede parllamentaria.

Según dixo, la voluntá del Gobiernu sigue siendo algamar el mayor grau de consensu sobre la reforma llaboral, y, nesti sen, calcó en que "si'l testu nun cuenta cola robla de los axentes sociales, sí cuenta col espíritu de les sos aportaciones", conxuga los intereses d'empresarios y sindicatos y ye "equilibráu".
  
El Real Decretu Llei de reforma del mercáu llaboral que modifica causes de los despidos oxetivos, xeneralízase'l contratu indefiníu de despidu más baratu (33 díes por añu d'indemnización) y endurécense les condiciones pa contratar trabayadores temporales, ente otres midíes.
  
La reforma, que llegó al Conseyu de Ministros tres la falta d'acuerdu ente los axentes sociales, espertó la ira de los sindicatos, qu'anunciaron la convocatoria d'una güelga xeneral pal 29 de setiembre, al entender que la norma resulta lesiva pa los derechos de los trabayadores.
  
L'Executivu va aprobar la reforma llaboral un día depués de que la Comisión Europea avalare les midíes d'axuste aprobaes por España p'amenorgar el déficit públicu nesti momentu, pero pidiere al Gobiernu que concrete nos presupuestos del 2011 nueves midíes de recorte del gastu por valor del 1,75% del PIB pa llograr l'oxetivu de reducir el déficit hasta'l 6% nel 2011.
  
De primeres, la intención del Executivu yera algamar los votos necesarios ente los Grupos Parllamentarios pa convalidar la reforma, sin tramitala como proyectu de llei, colo que nun s'almitiríen enmiendes. Pero, a lo último, too apunta a que va permitir que se tramite como proyeutu de llei, tal como pidieron delles formaciones polítiques, ente elles el PP.
  
El Gobiernu yá entamó les negociaciones colos Grupos Parllamentarios y munchos tán poniendo oxeciones al testu, que quieren meyorar pela vía d'enmiendes.
  
La reforma aprobada güei'l Conseyu de Ministros va facer más fácil que les empreses puean efectuar despidos oxetivos por causes económiques, técniques, organizatives o de producción, dexando asina que les indemnizaciones vinculaes a estos despidos seyan de 20 díes por añu trabayáu.
  
Según el testu enviáu'l vienres pol Gobiernu a los axentes sociales y a los Grupos Parllamentarios va entendese por despidu colectivu la estinción de contratos de trabayu por causes económiques, técniques, organizativas o de producción que xustifiquen un reducción de les necesidaes d'empléu de la empresa.
  
Va entendese que se dan causes económiques cuando los resultaos de la empresa ofrecen perdes económiques "non puramente contestuales". A estos efectos, la empresa va tener qu'acreditar oxetiva y documentalmente los resultaos d'esplotación alegaos y xustificar que de los mesmos deduzse mínimamente la razonabilidá de la decisión estintiva.
  
No referente a les causes técniques, considérase que se dan cuando se produzan cambios nel ámbitu de los medios de producción; les causes organizativas cuando haya cambios nos sistemes y métodos de trabayu del personal, y les causes productives cuando haya cambios nos productos y servicios que la empresa pretende asitiar nel mercáu. Eso sí, la empresa tendrá de xustificar que les estinciones contribúin a superar les dificultaes qu'eviten el so bon funcionamientu al traviés d'una más adecuada organización de los recursos.
  
Coles mesmes, nel testu del Gobiernu fíxase en 15 díes el plazu de preavisu de los despidos oxetivos pa tou tipu de contratos fixos, y asítiase en 33 díes la indemnización por despidu de los contratos de fomentu del empléu, tanto si'l despidu oxetivu ye declaráu improcedente por un xuez como si ye reconocíu asina pol empresariu.
  
Nestos contratos, l'Executivu plantega financiar, con cargu al Fogasa, l'importe correspondiente a ocho díes d'indemnización pa despidos oxetivos individuales y pa despidos colectivos, aplicándose esta midida namás a los nuevos contratos de fomentu que superen l'añu d'antigüedá. Nel casu de que los contratos nun superen l'añu de vixencia, la indemnización sería abonada na so totalidá pol empresariu.
  
Otres novedaes del contratu de fomentu qu'inclúi la reforma del Gobiernu ye que'l so usu va ampliase a nuevos colectivos, de forma que va poder efectuase con aquellos paraos que lleven nel desempléu trés meses, frente a los seis meses actuales, y tamién va poder realizase a los paraos que nos últimos dos años namás tuvieren contrataos pente medies de contratos temporales. Esta ampliación nel usu del llamáu contratu de 33 díes taría vixente hasta últimos del 2012, momentu nel que se va realizar una revisión de los sos resultaos.

Conversiones de temporales a fixos

Tamién pa fomentar l'usu d'esti contratu, el Gobiernu reabre la posibilidá de realizar conversiones de contratos temporales nuna mesma empresa a esta modalidá de contratación indefinida. Nesti sen, nel testu especifícase que los contratos temporales vixentes a la entrada en vixencia del decretu van poder tresformase en contratos de 33 díes hasta'l 31 d'avientu d'esti mesmu añu, mientres que los que se celebren con posterioridá a la entrada en vixencia de la reforma, siempre que nun pasen de seis meses, van poder convertise a contratos de 33 díes antes del 31 d'avientu de 2011.
  
En materia de contratación temporal, l'Executivu llenda a un máximu de dos años la duración del contratu d'obra o serviciu, anque esti tope va poder ampliase pola negociación colectiva hasta un máximu d'un añu. Amás, el Gobiernu introduz una redacción "más estricta" de la regla actual al encadenamientu de contratos. Esta subida de la indemnización realizaríase progresivamente, de manera que se sumaría un día más por añu a partir del 2011, hasta llegar a una indemnización de doce díes en 2014.
 
Modelu austriacu y alemán

Nel so últimu documentu, l'Executivu incluyía na reforma llaboral l'abertura de consultes con sindicatos y empresarios pa, nel plazu d'un añu, constituyir un Fondu de Capitalización pa el trabayadores, semeyante al modelo austriacu, qu'éstos podríen cobrar nos supuestos de despidu, movilidá xeográfica o actividaes de formación. La parte que'l trabayador nun faiga efectiva nestos supuestos va percibise nel momentu de la so xubilación.
  
Les cantidaes incluyíes nesti Fondu van ser equivalentes a un númberu de díes de xornal por añu de serviciu que tovía ta por determinar, baxándose les indemnizaciones a abonar pol empresariu nos casos de despidu na mesma cuantía. Esti Fondu va tar operativu a partir del 1 de xineru del 2012 y namás va ser d'aplicación a los nuevos contratos indefiníos que se celebren a partir d'esa fecha.
  
Xuntu al modelu austriacu, la reforma llaboral adauta a la lexislación española parte del modelu alemán, pa que les empreses puean aplicar reducciones de xornada d'ente'l 10% y el 70% alegando causes económiques, técniques, organizatives o de producción.
  
La reforma del Gobiernu va dexar que les clauses de inaplicación de los acuerdos salariales tamién puean aplicase cuando les perspectives de la empresa o la so estabilidá económica puean vese perxudicaes por mor del cumplimientu del réxime salarial, afectando a les posibilidaes de caltenimientu del empléu na mesma.
  
Cuando los convenios colectivos nun incluyan la citada cláusula, ésta va poder establecese por acuerdu ente l'empresariu y los representantes de los trabayadores de la empresa, "previu desarrollu d'un periodu de consultes de duración non superior a 15 díes".