El país necesita ayuda esterior por mor de l'aguada

El Principáu alzó a situación 2 el Plan d'Emerxencies dada la situación de llenes nes zones central y oriental, producíes pola aguada de les últimes hores y la llena de dellos ríos.

Esta situación supón que p'atender toles incidencies rexistraes foi necesariu solicitar la collaboración de medios esternos a la Comunidá Autónoma. Nestos momentos yá se dirixe haza Les Arriondes la Unidá Militar d'Emerxencies. Va Collaborar col treslláu de personal y evacuación d'afeutaos.

Ante esta situación, dende los Servicios d'Emerxencies d'Asturies encamiéntase a la población que tengan en cuenta les siguientes midíes de autoprotección como revisar dacuando'l so teyáu y baxaes d'agua, y desaniciar toles acumulaciones d'escombros, fueyes y tierra que puean trancar el pasu de l'agua al alcantarelláu o cuneta próxima a la vivienda.

Amás, encamienten tener preparáu un botiquín de primeros auxilios y melecines necesaries fuera del algame de l'agua, asina como una linterna y una radio a piles. Tamién colocar documentos importantes, oxetos de valor, alimentos y agua potable en llugares altos de la vivienda, y fuera del algame de l'agua.
 
Espinosa viaxa a Asturies
 
La ministra de Mediu Ambiente y Mediu Rural y Marín, Elena Espinosa, viaxa güei a Asturies pa visitar les zones afectaes poles inundaciones y caltener contactos col Gobiernu d'Asturies sobre la situación y la collaboración institucional pa reestablecer la normalidá.
 
Asina lo anunció güei na so comparecencia ante la Comisión de Mediu Ambiente del Senáu, onde espresó la so solidaridá colos afectaos poles inundaciones y ofreció "tola collaboración del Gobiernu d'España a les autoridaes del Principáu d'Asturies".
  
En concreto, la titular de Mediu Ambiente va visitar mañana Les Arriondes y Pravia, onde se va reunir colos alcaldes de les zones afectaes poles inundaciones.

Evácuase a 77 persones y trelládase a enfermos
 
Efectivos de la Guardia Civil y emerxencies procedieron güei, dende les 9.00 hores, a la evacuación d'un total de 77 persones en dellos conceyos, especialmente del Oriente d'Asturies. Nesti momentu, ta trabayándose na evacuación de los enfermos del hospital Grande Covián (Les Arriondes), pero namás los d'hemodiálisis confirmaron a Europa Press fontes de la Benemérita.
  
En concreto, desagospióse a diez persones del hotel 'Casa y Campo', na población de La Venta (Cangues d'Onís), asina como otros 20 del hospital de Salú Mental de Les Arriondes, conceyu onde tamién se procedió a treslladar a 33 persones de la residencia Parres a la ilesia de la población. Nesti últimu casu, tán faciéndose xestiones pa que dellos médicos puean tar acompañándo-yos.
  
Per otru llau, hubo que desagospiar a un total de 14 viaxeros del tren de cercaníes de FEVE de la llinia Xixón-Llaviana al altor de la población de Xixún (Siero). Los servicios d'emerxencia temen amás que la situación de Les Arriondes se repita en Cangues d'Onís, onde ta empezando a haber tamién grandes inundaciones.
  
Nel operativu montáu na zona oriental, tán desplazaos dellos equipos de la Guardia Civil: Serviciu de Monte de Cangues d'Onís; dos embarcaciones fueraborda neumátiques del Serviciu Marítimu; Grupu d'Actividaes Subacuátiques (GEAS); un total de 30 componentes de la Unidá de Seguridá Ciudadana de la Comandancia de Xixón; y patrulles de los puestos de Cangues d'Onís, Llanes, Les Arriondes y Ribasella. Amás, Protección Civil ta montando en Les Arriondes un puestu de mandu pa xestionar les emerxencies al par de la Guardia Civil.