Los frangüesos yá tán n'Asturies

Yá llegaron a los Picos d'Europa los dos primeros exemplares de frangüesos cedíos por Aragón colos que se va empecipiar la reintroducción de la especie nel Parque Nacional.

Los exemplares foron recuperaos nel mes de febreru y provienen de pareyes de frangüesos del Pirinéu aragonés que n'años anteriores amosaren un peraltu índiz de fracasu na capacidá pa sacar les sos puestes alantre.  

Los exemplares foron cedíos pol Gobiernu d'Aragón al del Principáu pa la reintroducción, que se va executar al traviés del Parque Nacional, nel marcu del Protocolu de Collaboración que dambos Gobiernos establecieron en 2005 en materia de xestión y caltenimientu del mediu natural.

Esta primera suelta tien un calter esperimental y va efeutuase colos exemplares radiomarcados y sometíos a un siguimientu continuu, lo que va permitir adquirir información adicional etolóxica y sobre patrones de dispersión que van tener un altu valor pal desenvolvimientu del programa n'años vinientes.

Por razones técniques y pa facilitar la reintroducción de los exemplares, los frangüesos tienen de permanecer aisllaos nel mediu natural d'adaptación, ensin interferencies nin molesties, polo que los trabayos de de les próximes selmanes van desenvolvese cola debida discreción y reserva hasta que llegue la hora de la suelta de los exemplares, fecha que ta pendiente del desenvolvimientu y crecedera de les aves.

El frangüesos desapaeciera de los Picos d'Europa y d'Asturies a mediaos de la década de los cincuenta del sieglu pasáu, non tantu pola acción direuta de la persecución del home, sinón como víctima indirecta del acosu d’otres especies y del desinterés xeneralizáu pol so futuru.