Asturies dispón d'un mapa de foses comunes con 343 enterramientos

La Conseyería de Bienestar Social dispón del primer mapa de foses comunes con 343 enterramientos en 55 conceyos, que va tar a disposición pública en 'www.asturias.es'.

Del total d'enterramientos, 322 correspuenden a víctimes de la represión franquista y 21 a combatientes; coles mesmes 60 son individuales y el restu colectives. Pal desarrollu del mapa contrastáronse distintes fontes documentales y orales qu'acrediten total o parcialmente les foses.

Según esplicó en rueda prensa'l viceconseyeru de Bienestar Social, Ángel González, esta iniciativa pretende cumplir colos oxetivos de la Llei de Memoria Histórica y ofrecer a la ciudadanía la ubicación de foses nel territoriu asturianu.
  
Pa González, "hai que llevar la llei a la práctica" dende les alministraciones, dao que "anque ye manifiestamente meyorable" pretende desquitar la memoria de los que trabayaron por promover "la llibertá y la democracia". "L'Alministración tien que moyase y promover esta práctica y nun dexala al voluntarismu de naide", remarcó afirmando que "la represión franquista n'Asturies foi espectacular".
  
Ángel González anunció que se trabaya pa la señalización de les foses, pa lo que va haber qu'escoyer el tipu d'identificación pa la contratación de materiales.
  
El viceconseyeru indicó que'l mapa de foses ye'l resultáu de la collaboración ente la Conseyería y la Universidá d'Uviéu, al traviés de la Facultá d'Historia, y va treslladase al Ministeriu de Xusticia pa incluyilu nel Mapa Integráu de Foses que ta ellaborando en collaboración con otres comunidaes. "Tovía queda muncho trabayu por facer", dixo resaltando qu'ésti ye'l primer pasu.
  
Amás, reseñó qu'esisten quexes ente delles comunidaes de la "poca" collaboración del Ministeriu de Defensa que ta mostrando una actitú "cicatera" cuando tendría de ser "ún de los más interesaos" en facilitar la documentación de los sos archivos.
  
Pela so parte, la profesora d'Historia Contemporánea que dirixe la investigación, Carmen García, remarcó la complexidá del procesu y l'espardimientu de les foses pel territoriu. Sicasí, estimó en más de 6.000 persones morrieron asesinaes pola represión franquista, nunos 15.000 los muertos en combate, y nunos 2.000 los represaliaos pol bandu republicanu.    
  
Asina, señaló que ye difícil dar cifres concretes "nin agora nin nunca" sobre'l númberu de cadabres qu'hai nes foses asturianes, anque sí comentó que más de 3.000 tán identificaos, anque puen ser munchos más, y la mayoría tán ente los cementerios de San Salvador n'Uviéu, Ceares (Xixón), y en La Carriona (Avilés), asina como n'otros campusantos municipales.
  
D'esta manera, la historiadora remarcó qu'hai "faltes" na información documental, que torguen, por casu, saber "los soldaos moros cayíos en combate". De la mesma manera, dixo que "la represión irregular y indocumentada del franquismu nunca podrá contabilizase entera".
  
Otru de los miembros del equipu, encargáu de la ellaboración del mapa de foses, Pedro Alonso, resaltó la complexidá d'identificar los enterramientos y apuntó qu'antes del casu 'Garzón' nun había problemes pa ver los archivos parroquiales y agora hai más torgues.
  
Al respecto, Ángel González tamién indicó qu'existen dellos conflictos ente propietarios de terrenes, onde hai enterramientos y les families de los ellí represaliaos. Asina, mostró la voluntá de solucionar esos problemes, anque dixo que "si nun hai un acuerdu va haber qu'espropiar el suelu", y punxo como exemplu'l casu de la Fosa de San Miguel de la Barreda, na zona Siero y Noreña.