La superficie dedicada al pumar supera les 10.000 hectárees

Asturies tien un total de 10.325 hectárees dedicaes al cultivu del pumar, de les que más de 2.000 tán en Villaviciosa. Los conceyos del Navia-Eo son los que menos tienen.

La Conseyería de Mediu Rural y Pesca, en collaboración cola Área d'Información y Xestión Cartográfica del Centru de Cartografía, encargóse a finales del pasáu añu al Institutu de Recursos Naturales y Ordenación del Territoriu de la Universidá d'Uviéu (INDUROT) la ellaboración d'una cartografía del pumar n'Asturies que dexara conocer la superficie destinada a esti cultivu, según la so distribución xeográfica.

El Conseyeru de Mediu Rural y Pesca, Aurelio Martín, y el Director del Institutu de Recursos Naturales y Ordenación del Territoriu del la Universidá d'Uviéu (INDUROT), Miguel Ángel Álvarez, presentaron esta mañana la cartografía dixital, a escala 1:25 000, cola distribución de les plantaciones de pumar utilizando les últimes fontes cartográfiques disponibles.

Trátase d'un inventariu materializáu al traviés d'una base de datos que puede emplegase como una ferramienta actualizada, dexando analizar en detalle datos sobre la distribución en superficie de los plantaciones de pumar pa distintos ámbitos xeográficos, físicos, alministrativos y de xestión.

Los datos ufierten la posibilidá de conocer la situación de los plantaciones tocantes a edá, grau de deterioru o d'abandonu, densidá, destín de la producción, o detectar variedaes locales d'interés.

La cartografía permitirá funciones d'un Sistema d'Información Xeográfica, una vegada que se desenvuelvan los distintos trabayos, tantu de gabinete (d'identificación de propietarios de finques) como de campu (caracterización según parámetros de variedá, densidá, capacidá granible, estáu fitosanitariu…). Esta cartografía tien d'actualizase siempres que se disponga de nueves ortofotografíes aérees, col fin de dir evaluando la distribución de la especie.

Mientres la presentación, Aurelio Martín recordó que la ellaboración d'un censu de pumaraes yera una reivindicación hestórica del sector “que plantegaba la oportunidá de conocer el potencial d'esti cultivu” y señaló qu'esti estudiu “ufierta un analís real de les pumaraes n'Asturies, tantu en términos cualitativos como cuantitativos”.

Situación de los pumares

En total, tol país tien 10.325 hestárees de plantaciones de pumaraes. Villaviciosa con 2.232 hectárees ye’l conceyu con más superficie dedicada al cultuvu de pumar. Siguen nel ranking Xixón (1.128), Siero (757), Piloña (406), Colunga (398) y Uvíeu (327).

La mayoría de conceyos del Navia-Eo asítiense nos últimos puestos, dende A Veiga (7,6), Santiso d’Abres (5,5), Ibias (3,9), los de la comarca d’Os Ozcos, Pezós y Eilao (ente 3 y 2). Sicasí, los que menos hectáreas dediquen a los pumares son los conceyos occidentales de Yernes y Tameza (1,6) y Degaña, que con una hectarea pieslla la llista.