Un programa asturianu va permitir marcar les fronteres llingüístiques

La próxima selmana va presentase en Valladolid CartoDial, un proyeutu del Seminariu de Filoloxía Asturiana que va permitir tipificar l'eonaviegu y llendar les fronteres ente llingües.

Fernando Álvarez-Balbuena García, Ramón d’Andrés Díaz, Xosé Miguel Suárez Fernández y María Cueto Fernández van intervenir nel IX Congresu Internacional de Llingüística Xeneral, que se va celebrar na Universidá de Valladolid del 21 al 23 de xunu.

El tema a tratar va ser ‘La horiometría o dialectometría de frontera’. Esta intervención relaciónase col proyeutu d'investigación ETLEN, sigles del ‘Estudiu de la Transición Llingüística na Zona Eo-Navia, Asturies’, que lleva a cabu un equipu interdisciplinar de filólogos y informáticos de la Universidá d'Uviéu.

Esti trabayu busca facer una aportación sustancial a la conocencia de la frontera ente los dominios llingüísticos gallego-portugués y asturlleonés nes zones más occidentales d'Asturies y limítrofes de Galicia.

Los mentaos investigadores van presentar en primicia'l novedosu programa informáticu CartoDial (Cartografía Dialectal), creáu pol equipu del ETLEN. Esti programa ye capaz de xenerar automáticamente gracies a la enorme cantidá de datos llingüísticos del proyeutu dos tipos de mapes: mapes dialeutográficos de la zona d'estudiu, nuna cantidá superior a dos mil; y, como aportación esclusivamente orixinal, más de quinientos mapes horiométricos.

Esto mapes muestren la configuración llingüístico-estadística de les diverses fales de la zona d’Entrambasaguas, tipificaes según la proporción de trazos gallego-portugueses, asturlleoneses y específicamente eonaviegos. Mostraráse un adelantu de lo que nun futuru próximu va ser l'Atles de la Transición Llingüística na Zona Eo-Navia, que será dialectográficu, horiométricu y dialectométricu.

El programa CartoDial, nacíu d'una investigación fecha na Universidá d'Uviéu, aspira a convertise nuna ferramienta amañosa pal estudiu horiométricu d'otres conocíes fronteres llingüístiques de la Península Ibérica y d'otres zones d'Europa.

Tamién se mostrarán datos matemático-estadísticos de la zona Navia-Eo procesaos d'acordies col programa informáticu VDM (VisualDialectometry), concebíu, desarrolláu y adaptáu al proyectu ETLEN según los principios de la dialeutometría, pol equipu del profesor Hans Goebl, de la Universidá de Salzburgo (Austria).