Israel condena a Castro por comparar la bandera cola esvástica

Un voceru del Ministeriu d'Asuntos Esteriores israelín, Yigal Palmor, criticó al ex-presidente cubanu Fidel Castro por comparae la bandera israelina cola esvástica.

Les pallabres de Castro foron espublizaes nun testu de la delegación de Cuba ante'l Conseyu de Derechos Humanos de la ONU (CDH). "Con estos escandalosos comentarios, Fidel Castro avergoña a los sos antiguos compañeros y los ideales que siempre pretendió defender. El Che Guevara tien que tar revolviéndose na so tumba", afirmó Palmor en declaraciones dende Xerusalén.

Los comentarios de Castro, incluyíos na so columna d'opinión 'Reflexones' publicada'l pasáu vienres, publicáronse polos cubanos a delegaciones y periodistes con vistes a la xunta d'esti llunes en Xinebra del CDH, un organismu compuestu por 47 países y qu'esti llunes debate l'actuación d'Israel nos territorios ocupaos palestinos.
  
"L'odiu del Estáu d'Israel contra los palestinos ye tal, que nun vacilaríen n'unviar al millón y mediu d'homes, muyeres y neños d'esi país a los crematorios nos qu'esterminaron los nazis a millones de xudíos de toles edaes", caltién Castro nel so artículu.
  
Castro aseguró que "la cruz gamada del Führer, paeciere ser la bandera güei d'Israel", anque matizó qu'esta opinión "nun naz del odiu" sinón "del sentimientu d'un país que se solidarizó y emprestó agospiu a los xudíos cuando nos díes duros de la Segunda Guerra Mundial, el gobiernu proyanki de Batista trató d'unviar de regresu dende Cuba un buque cargáu d'ellos, qu'escapaben de Francia, Bélxica y Holanda, por causa de la persecución nazi".