La Conseyería d'Educación ofrez siete nuevos ciclos de FP Inicial

Educación ofrez pal próximu cursu siete nuevos ciclos profesionales de FP, colo que'l catálogu de titulaciones elévase a 86, De los que 53 son de grau superior y 33 ciclos de mediu.

Ayeri abrióse'l plazu pa solicitar l'accesu a estos estudios, que se va prollongar hasta'l próximu día 2 de xunetu, según informó la Conseyería en nota de prensa. Les solicitúes tienen de presentase nos centros onde pretenda realizase la formación.
  
Los nuevos ciclos contemplaos na ufierta del próximu cursu son, na modalidá presencial 'Eficiencia enerxética y enerxía solar térmica', que se va impartir nel Centru Integráu de Caltenimientu y Servicios a la Producción, en Llangréu; 'Producción agroecolóxica', ufierta de nuevu cuñu que se va impartir la primer vez n'Asturies, concretamente nel IES Lluces de Colunga; y 'Cuidaos Auxiliares d'enfermería', que se crea como nuevu ciclu nel IES Cangas.
  
Na modalidá a distancia, la ufierta ta compuesta por 'Alministración de Sistema Informáticos en Rede', nel IES Númberu 1 de Xixón; 'Cuidaos Auxilaries d'Enfermería', nel IES Númberu 1 de Xixón; 'Cocina y gastronomía', nel Centru Integráu de FP d'Hostelería y Turismu de Xixón; y 'Instalaciones Eléctriques y automátiques', nel IES Isla de la Deva, en Piedras Blancas.
  
La Formación Profesional pal cursu 2010-2011 va impartise en 66 centros sosteníos con fondos públicos: 6 Centros Integraos, 50 Institutos d'Enseñanza Secundaria y 10 Centros Concertaos, distribuyíos en tol territoriu ente les zones d'Oriente, Xixón, Cuenques, Avilés, Uviéu y Occidente.
  
El centru cola mayor ufierta va ser en nuevu Centru Integráu de FP d'Avilés, de carácter públicu y asitiáu nel centru de la ciudá. El centru, que naz de la fusión del Suanzes y del Valliniello, va tener más de 1.000 alumnos y va impartir nueve families profesionales distintes na modalidá presencial y una tamién na modalidá a distancia: 'Alministración', 'Edificación y Obra Civil', 'Eletricidá y Electrónica', 'Fabricación Mecánica', 'Informática', 'Instalación y Caltenimientu', 'Tresporte y Caltenimientu de Vehículos', 'Imaxe personal' y 'Química'.
  
En total, la ufierta d'Asturies algama les 22 families profesionales, ente les que se cuenten Enerxía y Agua, Actividaes Agraries, Alministración, Actividaes Físiques y Deportives, Actividaes Marítimu-Pesqueres, Artes Gráfiques, Comunicación, Imaxe y Soníu, y Comerciu y Marketing, ente otres.
  
Los Ciclos Formativos pretenden dotar al alumnáu de la competencia profesional que permita, tres el llogru del títulu, incorporase al mundu llaboral pa desarrollar con garantíes l'oficiu correspondiente de 'Técnicu Superior' y 'Técnicu'. La FP tornó nun instrumentu de cualificación esencial y nun impulsu pa la competitividá y productividá de les empreses.