Aldeanos congoleños formen grupos de defensa escontra los rebeldes del LRA ante la "ineficacia" del Exércitu

|

Los aldeanos congoleños tán creando grupos pa protexer les sos cases y les sos families del grupu rebelde ugandés LRA (Exércitu de Lliberación del Señor). Les milices d'esta organización atacaron la ciudá de Dungu en setiembre, como resultáu del fracasu de les negociaciones p'algamar un tratu de paz qu'acabare con dos décades de guerra escontra'l Gobiernu d'Uganda.

Nesti momentu, nin un solu soldáu congoleñu foi desplegáu na ciudá de 57.000 habitantes, llocalizáu cerca del Parque Nacional de Garamba, la fortaleza del LRA dende qu'esti grupu fuxere a Congo nel 2005.

El 14 d'avientu una fuerza multinacional dirixida por Uganda, qu'incluyía soldaos congoleños y de Sudán, llanzaron una ofensiva col oxetivu de detener al cabezaleru rebelde, Joseph Kony. En vez d'eso, la operación dividió a los rebeldes en grupos más pequeños qu'agora tán atacando pueblos, matando civiles, violando muyeres y secuestrando neños pa usalos como esclavos sexuales y neños soldáu.

El cabezaleru de la fuerza d'autodefensa de Dungu, l'antiguu xefe Etienne Dalafata, dixo qu'a pesar del despliegue de más de 3.500 soldaos del Gobiernu nel área, los pueblos deben defendese colos sos propios medios. "Desarrollamos operaciones col Exércitu, pero cuando entramos na xungla ellos s'asustaron y fuxeron. Son soldaos de ciudá", esplicó Dalafata. A la so vez informó de que la so fuerza agradez l'ayuda y que les milicies cruzaron les fronteres del norte del Congo.

Felicien Balani, presdiente de la sociedá civil llocal de Dungu, alvirtió escontra la posibilidá de qu'estos grupos de defensa se vuelvan escontra de los propios intereses de los aldeanos. "El nuesu exércitu debe facelos innecesarios. Ellos alcuentren la so xustificación na ineficacia del Exércitu. Si esto dura otros seis meses o un año, van entamar a tener meyor equipamientu y mos arriesgamos a un fenómenu Mai Mai", declaró.

Les milicies Mai Mai cruzaron al este del Congo nos 90 demientres les invasiones de Ruanda y grupos rebeldes, afines al poder d'Uganda. Como los homes de Dalafata, los Mai Mai de primeres dixeron que tomaben les armes pa protexer les sos comunidaes. Pero garraron notoriedá poles sos masacres sangrientes a civiles, violaciones y rituales de canibalismu. Dende setiembre, la milicia Dungu fizo sólo tres prisioneros de la LRA nos sos numberosos enfrentamientos colos rebeldes ugandeses.

Los rebeldes del LRA asesinaron a 567 persones y desallugaron a 115.000 nel noroeste de la provincia oriental de la República Democrática del Congo dende setiembre, según declaró l'Altu Comisionáu de les Naciones Uníes pa los Refuxaos (Acnur). Los ataques entamaron dempués de la ofensiva anti LRA encabezada poles fuerces ugandeses n'avientu.

Contador Estadistiques