Los hosteleros dicen que "ye momentu de gobernar ellos mesmos"

El presidente d'Hostelería d'Asturies, José Almeida, dixo que ye momentu de que la iniciativa privada s'una pa encarar la crisis, yá que que "la ilusión nes Alministraciones ta acabándose".

"Ye'l momentu de gobernar nós mesmos porque nel momentu en que tamos de crisis nenguna de les Alministraciones dio'l do de pechu'", dixo Almeida, qu'añadió que "ye agora cuando la iniciativa privada tien que sacase les castañes del fueu".
  
Almeida pronunciábase asina mientres la presentación del Club d'Hostelería d'Asturies. Aseguró que "sin querer entrar en nenguna confrontación" hai que dicir que les Alministraciones nun fixeron los deberes y mientres los mesmos hosteleros tuvieron y tán trabayando, "nesti momentu nun hai nengún color na política" que-yos muestra confianza.
  
Asina, en referencia a les consecuencies del temporal nel sector hosteleru indicó que yá se punxeron en contactu colos hosteleros afeutaos y concretamente nel casu de los del conceyu de Gozón yá visitó delles instalaciones afeutaes. "Dímos-yos en primer llugar apoyu y ciñu y agora queremos faer dalgo, pero hai qu'estudiar y sopesar lo que pue faese", dixo Almeida, qu'añadió que "van poner tola carne nel asador" p'ayudar a los afectaos.
    
Sicasí y a pesar del temporal, el presidente de los hosteleros asturianos "nun considera que la temporada vaya a dir mal" porque confía na iniciativa privada que "ye xente imaginativa". "El tiempu de respuesta de los hosteleros na recuperación va ser rápido y vamos superar la situación", dixo Almeida.
  
"Si tenemos menos turistes nun va ser pol agua. Les coses nun se fixeron bien, anque tenemos de reconocer que nós tamién cometimos errores y somos culpables", añadió'l presidente de los hosteleros asturianos.
 
CLUB HOSTELERÍA.
  
Sobre'l Club d'Hostelería, trátase "d'una iniciativa que crea un ámbitu de participación y collaboración de l'Asociación y los sos integrantes con un grupu de diez empreses líderes caúna d'elles nel so sector". Esta collaboración concrétase en distintes acciones y proyectos que'l so oxetivu ye promover la meyora global del colectivu hosteleru coles empreses que la conformen.
  
Les empreses integrantes del Club d'Hostelería son, xunto cola Asociación, Caxastur, Central Llechera Asturiana, Aguas de Fuensanta, Bodegas y Viñedo del Grupo Masaveu, Ignacio García Rodríguez Equipamiento de Hostelería, Lidera Higiene, Grupo Norteños, Cafés Oquendo y Cerveza San Miguel.
  
Fomentar la formación y meyorar la comunicación y cooperación ente'l sector y les empreses provisores son algunos de les principales exes nos que se fundamenta'l club.