El Conceyu por Otra Función Pública alvierte del predominiu del clientelismu na Alministración del Principáu

|

El Conceyu por Otra Función Pública n'Asturies alvirtió güei, al traviés d'un comunicáu, el predominiu, qu'al so xuiciu, esiste na Alministración Pública autonómica de la designación a deu y los ascensos por confiances personales nel funcionariáu. En otres coses, señaló que'l 26,36 por cientu de los puestos d'ascensu pal personal funcionariu son reservaos pa designaciones a deu.

Al traviés d'una nota prensa, el colectivu, creáu'l pasáu mes de payares, pidió a Izquierda Unida, coalición que forma parte del Gobiernu del Principáu, qu'aplique les midíes que propunxo nel so programa electoral en cuanto al "desaniciu del clientelismu y de la patrimonialización" na función pública asturiana.

Nesti sen, recordó'l comunicáu que "na última rellación de puestos de trabayu del personal funcionariu espublizada'l 16 de mayu, atópense un total de 2.086 puestos singularizaos, ye decir, d'ascensu na carrera profesional o de nivel superior a los puestos d'entrada o puestos base, de los que 550 son provistos pel sistema del deu o de la confianza política, lo que supón el 26,36 por cientu de los puestos d'ascensu pal personal funcionariu". "Con estos porcentaxes, ¿pue dicise que la llibre designación ye, como esixe la llei (y propón Izquierda Unida nel so programa) un sistema esceicional n'Alministración del Principáu d'Asturies?", entruga la nota.

Recordó tamién el comunicáu que "la llei diz que los puestos vacantes nun puen ocupase provisionalmente más d'un añu y que tienen que sacase a concursu nesi plazu, pero na práutica les convocatories nun se faen y los nomamientos provisionales o en comisión de servicios duren dellos años". "Cómo estos nomamientos provisionales fáense tamién pela vía dixital, alcontrámonos 'de facto' con una carrera profesional puesta al aviesu: el concursu de méritos ye la exceición y la llibre designación la regla xeneral", esplica'l comunicáu.

"Pa remachar esti sistema", añade'l comunicáu, "l'anteproyeutu de llei de Función Pública, qu'el Gobiernu asturianu ta acabante de espardir, pretende imponer un mecanismu de concursu específicu pa la provisión de tolos puestos de trabayu de carrera, nel que los méritos subordínense al resultáu de la presentación d'una memoria y/o d'entrevistes colos candidatos cuando, hasta agora, esti concursu específicu yera un procedimientu estraordinariu". "Ta perclaro que los que tarán nes meyores condiciones pa facer esa memoria de la plaza o pa defendese na entrevista sedrán aquellos que yá la ocupen en comisión de servicios, ye dicir, los nomaos a déu", considera.

Critica tamién la téunica de la "evaluación del desempeñu, empobinada a argayar dafechu la igualdá salarial y les condiciones imprescindibles de imparcialidá y neutralidá política, en cuantes que'l salariu y la permanencia en puestos algamaos por concursu de méritos dependerán dafechu de los informes de funcionarios nombraos a déu polos partíos gobernantes".

Por too ello, pal Conceyu "nun ye dexaxerao considerar que lo ta en xuegu n'Asturies ye la esencia mesma del sistema constitucional de Función Pública", porque, al so entender, "el clientelismu llaboral ye'l sistema dominante pa la provisión de puestos na Alministración asturiana".

Por esti motivu, la nota exixe a IU "que cumpla col programa y compromisu ellectoral y adopte, con urxencia, les iniciatives polítiques y llexislatives afayadices empobinaes a qu'una Alministración Pública oxetiva, imparcial y al serviciu del interés xeneral seya posible n'Asturies".

Contador Estadistiques