Destaquen l’altu valir socioeducativu de los bolos y piden la so promoción

Un congresu axuntó en Cangas a investigadores y representantes de los bolos, que solliñaron la necesidá d’entamar midíes pa tresmitir la cultura bolística nes escueles.

El pasáu sábadu 12 de xunu, el Palaciu d’Oumaña de la villa canguesa foi'l puntu d'alcuentru de los amigos y los estudiosos de la tradición bolística asturiana colc ongresu “Los bolos, tradición, cultura y patrimoniu del pueblu asturianu”. Na mesa d'apertura, Francisco Álvarez, presidente de l'Asociación del Bolu Vaqueiru, organizadora del eventu y que cumple anguaño una década d'esistencia, xustificó la importancia del congresu dando pasu a dalgunos de los representantes de les entidaes collaboradores y coorganizadores (Grupu de Desenvolvimientu Local Altu Narcea Munieḷḷos, Escuelactiva, Conceyu de Cangas, Caja Rural y Banco Herrero). Convidáu a participar na inauguración del congresu, el presidente de la Federación Asturiana de Bolos, Desiderio Díaz, sorrayó la importancia cultural y patrimonial de los bolos asturianos.

La primera de les ponencies de la mañana corrió al cargu de Fernando Maestro, director del Muséu de Xuegos Tradicionales de Campu (Huesca) y miembru de la directiva de l'Asociación Europea de Xuegos Tradicionales. Con “Juegos tradicionales, una forma de compartir un lenguaje común en la Europa actual” fixo un percorríu pel ampliu panorama de xuegos ente los que rescampla la gran familia de los bolos. Maestro fixo fincapié nos valores y na carga emotiva d'estes práutiques tresmitíes de xeneración en xeneración.

La segunda ponencia, “Bolos asturianos: ḷḷier bien la tradición yía escribir el futuru” yera obra del etnógrafu y llicenciáu n'actividaes físico-deportives, Carlos Suari. Nella conectó dalgunes de les conclusiones del so postrer trabayu “Atles de los Bolos Asturianos” cola necesidá de diseñar  estratexes socioeducatives empobinaes a la defensa d'esta parte de la nuesa cultura. Suari aprovechó la ocasión pa esplicar por qué y cómo investigar los bolos cola mirada puesta na so promoción na sociedá contemporánea.

Tres les ponencies llegó'l momentu de los coloquios, el primeru d'ellos sobre la situación actual y les perspectives de futuru de los xuegos de bolos federaos. Intervinieron Octavio Rodríguez pola cuatriada, Ceferino Fernández pol bolu celta, Fernando Blanco pol batiente, José Antonio Fernández pol bolu palma, Rafael García pol bolo rodao y Manuel Aumente pol bolu vaqueiru.

El segundu coloquiu de la xornada trató de “el juego de los bolos a través del tiempo: legado y futuro del pueblo asturiano”. Isidro Caballero rellató la esperiencia y les perspectives del Museo de los Bolos de Asturias, Andrés Menéndez esplicó'l xuegu de pasabolos de la emigración canguesa en Madrid, Ruperto Álvarez comentó l'exerciciu de recuperación de los bolinos en Cuideiru, Alejandro López -na mesma llinia- esquematizó pasáu, presente y futuru de los bolos del Navia, y finalmente, Tino Lozano fixo una semblanza y delles reivindicaciones alredor del dexabolu xixonés.

Nes conclusiones finales, tolos especialistes atinaron a sorrayar la estinción inmediata de les víes de tresmisión xeneracional de la tradición, colo que se fai urxente desenvolver nueves estratexes pa salvaguardar estes pieces lúdiques”. Xuegos, de peraltu valor social y educativu que, según investigadores y representantes de les modalidaes, “han d'acompañase de cursos xeneralistes y pal profesoráu y de más medios d'inclusión tanto na enseñanza formal como n'actividaes de tipu lúdicu-cultural”.

Les modalidaes federaes pela so parte solicitaron un mayor sofitu de les instituciones públiques y de los medios de comunicación, mientres facíen una reflexón interna pa nun desapegase d'aquello que marca la tradición en boca de los informantes, xugadores de siempre que yá xugaben a los bolos muncho primero del actual fenómenu deportivu.