IU reclama la participación d'alumnos y profesores na toma de decisiones

El coordinador d'IU d'Asturies, Jesús Iglesias, calcó güei en que tola comunidá universitaria, incluyíos los alumnos y profesores, tengan cauces de participación na toma de decisiones relatives a l'aplicación del Espaciu Européu d'Educación Superior (EEES) derivada de la Declaración de Bolonia, firmada en 1999.

Iglesias fizo estes manifestaciones nuna rueda prensa na que tuvo acompañada pol responsable del Área de Mocedá d'IU, José González, y pola diputada d'IU-BA-Verdes na Xunta Xeneral del Principáu, Emilia Vázquez. IU esplicó que la so formación ta d'acuerdu na esencia de la declaración de Bolonia, dao que los sos oxetivos son "dignos" y calquen en cuestiones como la movilidá o l'intercambiu.

Sin embargu, los responsables d'IU señlaron que tán "preocupaos" pola evolución del procesu. Asina, Iglesias criticó que se tardare tanto n''enfrentase a los cambios y faló de "falta de tresparencia y ausencia d'información" nel procesu.

Defendiendo una universidá pública y de calidá, Iglesias comentó qu'una de les prioridaes, según dixo, ha ser esclariar qu'haya una correcta financiación pa una meyora universitaria, dago que va tener de venir incluyíu nel paquete de la financiación autonómica o mediante un compromisu per parte de l'Alministración del Estáu. En cualquier casu, Iglesias consideró que les cantidaes que se recibieron hasta agora son "escases" y "ridícules".

En rellación a una mayor implicación de les empreses, apoyando proyeutos universitarios d'investigación, IU nun lo ve mal, pero alvierte que ye dalgo que nun pue significar una menor inversión pública. Iglesias reclamó asina un compromisu "fuerte" de financiación de la Universidá.

Pela so parte, José González, dixo que'l procesu nun pue esconder una "llimpieza inxustificada" del conocimientu, aludiendo a ciertes antigües llicenciatures que pondíen peligrar colos nuevos sistemes de graos y competencies profesionales. Refugó amás que s'atribuyan los costes finales a los alumnos y reclamó una universidá "igualitaria", a la que tol mundu puea acceder con independencia de los sos recursos. A lo último, Emilia Vázquez insistó na "poca claridá" cola que se ta desarrollando'l procesu de tresformación.