Los nacionalistes flamencos del N-VA van ocupar un terciu del Parllamentu

El N-VA, nuevu partíu de los independentistes y conservadores flamencos, impúnxose nes eleiciones belgues al llograr 27 de los 150 escaños del Parllamentu.

El so cabezaleru, Bart de Wever, dixo "tender la mano a los francófonos" pa negociar la fonda reforma del Estáu que reclamen los flamencos y que daría más competencies a les rexones.
  
Na so primer apaición na tarde electoral, ofreció a la comunidá francófona negociar pa encarar "lo antes posible" la "necesaria" reforma del Estáu, tres unes eleiciones anticipaes convocaes a 15 díes d'asumir la presidencia de vez de la UE y cola división del país como telón de fondu.
  
El Partíu Socialista valón (PS), que s'impunxo na metá sur del país y llogró 26 escaños na Cámara, recoyó'l guante de De Wever y mostróse dispuestu a negociar un alcuerdu "equilibráu" que beneficie a flamencos, valones y bruxelenses, según adelantó'l so líder, Elio di Rupo. El partíu socialista flamencu (Sp.A) suma 13 escaños.
  
La reforma del Estáu pa dar más competencies a les rexones en materia fiscal, empléu y seguridá social, amás de compartir la xestión de Bruxeles, son esixencies de los nacionalistes flamencos, pero tamién llinies coloraes pa les formaciones valones, a les qu'esmolez quedar relegaos pol norte, rexón más rica y con mayor población.
  
Frente a la victoria histórica de los nacionalistes flamencos del N-VA, otres fuerces independentistes de la metá norte del país sufrieron perdes importantes, como la Llista de DeDecker, que quedó sin representación parllamentaria, y la ultraderecha de Vlaams Belang, que namás pudo reeditar 12 de los 17 escaños algamaos nes elecciones del 2007.
  
Tamién perdieron apoyos los lliberales de los dos comunidaes: el Movimientu Reformador valón (MR) cayó cinco escaños hasta los 18, mientres que los flamencos del OpenVLD -que cola so salida del Gobiernu de coalición forzaron la dimisión del tovía primer ministru, el democristianu Yves Leterme- queden con 13 escaños, en perdiendo tamién cinco representantes.
  
La formación de Leterme, los Cristianodemócrates y Flamencos (CD&V), tres tres llexislatures siendo la primer fuerza, algama 17 escaños,  mientres que'l so equivalente francófonu (CdH) llogra nueve escaños.
  
Los verdes, pela so parte, caltiénense con ocho escaños na so representación valona (Ecolo) y gana un escañu y suma cinco, na so forma flamenca (Groen).
  
El N-VA caltién el so lideralgu nel Senáu, onde algama nueve de los 40 escaños en xuegu. El PS llogra siete escaños en recuperando trés, y cuatro representantes consiguen el Open VLD, el CD&V, el Sp.A y el MR. Los ultraderechistes del Vlaams Belang cuenten con tres escaños, per delantre de CdH (2), Ecolo (2) y Groen (2).
 
Próximos pasos
  
La Nueva Alianza Flamenca, que defende la independencia de la rexón, torna tamién na fuerza más votada en tol territoriu belga, polo que De Wever tendría de ser el primer candidatu al que'l rei Alberto II encargue la formación d'un nuevu Gobiernu.
  
Sicasí, el líder del N-VA declaróse nel pasáu dispuestu a apoyar a un líder valón pa dirixir el futuru Executivu federal, magar que Bélxica nun tuvo un primer ministru francófonu nes trés últimes décades. Di Rupo ye'l más señaláu por analistes y medios pa ocupar esti cargu.
  
Munchos políticos identifiquen el trunfu de N-VA col cansanciu de la opinión pública flamenca pola falta de meyores mientres los tres años de Gobiernu del democristianu flamencu Yves Leterme pa dar más autonomía a les rexones.
  
La eterna disputa ente flamencos y valones polos derechos llingüísticos d'un distritu electoral del entornu de Burseles, Bruxeles-Tope-Vilvoorde (BHV) foi'l detonante que fixo cayer al últimu Executivu federal.
  
A partir del llunes espérase que'l monarca entame una ronda de contactos colos cabezaleros de los grupos políticos y designe al vencedor que forme Gobiernu. Los complicaos equilibrios ente les dos comunidaes que tienen que respetar l'Executivu federal belga faen prever llargues negociaciones pa formar coalición, que podríen prollongase hasta la seronda, pese a que Bélxica va asumir esti 1 de xunetu la presidencia de vez de la UE.
  
En ganando les eleiciones en xunu del 2007, Yves Leterme precisó nueve meses y dellos amagos de dimisión pa construyir una fráxil coalición qu'a lo último cayó hai poco más d'un mes.