UNA solidarízase colos ganaderos de Carreño

UNA refuga que l’Alcalde de Carreño, Ángel Riego, nun ceda un llocal p’aconceyase los ganaderos y agricultores del conceyu contrarios a la costrucción d'una incineradora de residuos.

La pitición de los ganaderos y agricultores de disponer d'un llocal onde aconceyase, foi tratada nuna comisión informativa cellebrada na Casa Conceyu el caberu mes de mayu, na que s'alcordó que l'Ayuntamientu cedería un llocal y nun s'opondría a que los ganaderos del conceyu s'organizasen pa tratar y aldericar sobre la costrucción de la incineradora.

Sicasí, según diz Unidá Nacionalista Asturiana, l’Alcalde tomó la “decisión unillateral” de nun ceder nengún local. Polo que la organización califica a Riego de cacique, “que nun respeta los alcuerdos y decisiones tomaes democráticamente pola mayoría de los grupos políticos, y que refuga toles iniciatives y plantegamientos que non coinciden cola postura del so partíu”.

Poro, esixen una rectificación, amás del llocal solicitao. "Si esta rectificación nun se produz, presentaremos una moción d'urxencia nel próximu plenu municipal, pa obligar al alcalde a la cesión del llocal”, afirmen.

Del mesmu mou, la organización quier treslladar el so apoyu a los ganaderos y agricultores, “que se tán dando cuenta de los perxuicios que supondrá pa les sos esplotaciones ganaderes y agrícoles la construcción de la planta incineradora”.

UNA diz qu´hai países como Francia que prohiben la comercialización de la lleche y los productos agrícolas producíos nos 15 Km alrodiu d'una incineradora. “D'aplicase n'Asturies, afeutaría direutamente a una de les fasteres con mayor implantación de ganaderíes de lleche y supondría'l final d'un seutor mui maltratao y amenazao poles nefastes polítiques agrícoles y ganaderes”, solliñen pa finar.