Comunicáu d'AXA

La Xunta Directiva del Aconceyamientu de Xuristes pol Asturianu, tocante al artículu de don José Manuel Pérez tituláu A PROPÓSITU DEL COMUNICÁU DE (sic) AXA (lléase, Xurde Blanco) SOBRE’L TRABAYU D’HÉCTOR GARCÍA GIL, quier dexar perclaro lo que va darréu:

1.- El comunicáu del Aconceyamientu de Xuristes pol Asturianu de fecha 8 de xunu ye espresión de la voluntá, de sobra contrastada, de la Xunta Direutiva y, por eso, ye ella la que lu robla. El Secretariu nun fai más que tramitalu.

2.- L'AXA ta formáu por xuristes y como tal en temas que nun seyan xurídicos (filolóxicos) l`AXA ta a lo que digan les instituciones responsables na materia.

N'Asturies la Institución responsable en materia llingüística ye l'ALLA, asina, el criteriu d'autoridá de l'ALLA nesta materia, fai que los sos posicionamientos tengan valir xurídicu, non ya solo científicu-académicu.

3. L`AXA refugó de mano, y tan de frente como s`espeya nel comunicáu, les razones poles que nun compartía lo que ya entós s`apuntaba pol Mercator, y remitió a la persona que se puso en contautu con nós a l’ALLA y a dellos científicos de prestixu na materia.

Poro, naide nun tien derechu a engayar al Aconceyamientu con afalagos ya idees que nun comparte y eso ye xustamente lo que se quixo facer col agradecimientu que refugamos.

4.- Afitar que la llingua asturiana gocia d’una cooficialidá parcial ye d’un optimismu claramente favoratible pal mesmu gobiernu que mos afuega.

5.- Don José Manuel Pérez causó baxa nel Aconceyamientu de Xuristes pol Asturianu, a pidíu propiu, el 28 de mayu del 2009.

Venir agora a facelo público como daqué nuevo, y atechándose n’ataques personales al nuesu Secretariu, nun fai mas qu`amosar un facer mísere que nun merez mayor comentariu

6.- Con too, l`Aconceyamientu de Xuristes nin zarró nin zarra puertes a participar en nengún trabayu de conteníu xurídicu siempre que, polo menos, se tengan en cuenta o s`asoleyen les sos opiniones, y que, pal apartáu filolóxicu se cuente coles instituciones encargaes dello n`Asturies.

Pola Xunta Direutiva del Aconceyamientu de Xuristes pol Asturianu, robla’l so Presidente, Xosé María Estrada Janariz, n’Uviéu, a diez de xunu de dos mil diez.