Reconocen l’arte rupestre como niciu del pasáu común d'Europa

El Conseyu d'Europa concedió la distinción d'Itinerariu Cultural a la candidatura ‘Caminos d'Arte Rupestre Prehistóricu’, nel que s’inxerta l’arte rupestre asturianu.

El conxuntu de llugares visitables con manifestaciones rupestres prehistóriques d'España, Portugal, Francia, Italia, Irlanda, Suecia y Noruega, xuntos na Asociación Internacional “Caminos d'Arte Rupestre Prehistóricu” (CARP), vien de ser declaráu Itinerariu Cultural pol Comité Direutor de Cultura del Conseyu d’Europa.

Nella tán inxertes siete cueves asturianes: Cueva d'El Pindal (Ribadeva), el Monumentu rupestre de Peña Tu (Llanes), la Cueva de La Loja (Peñamellera Baxa), la Cueva del Buxu (Cangues d'Onís), el Dolmen de la capiella de la Santa Cruz (Cangues d'Onís), les Cueves de Tito Bustillo y la Cuevona (Ribeseya) y la Cueva de la Peña de San Román (Candamo). Delles d'estes cueves fueron inscrites nel Llistáu de Patrimoniu Mundial de la UNESCO en xunetu de 2008.

Nel so conxuntu ufierta hasta 100 grandes destinos arqueolóxicos, conformando una gran rede que va dexar, amás, desenvolver actividaes conxuntes d'estudiu científicu, formación d'espertos, caltenimientu, difusión socio-cultural y turismu sostenible.
 
Con esta aprobación, Europa pon en marcha'l primer Itinerariu Cultural del Conseyu d'Europa basáu en destinos arqueolóxicos de la Prehistoria europea, reconociendo d'esta forma, que les primeres espresiones artístiques desenvueltes pol Homo Sapiens constitúin un referente del pasáu común del Continente.