Turquía y Hamás van demandar a los autores del asaltu a la flota solidaria

|

Turquía y el Movimientu de Resistencia Islámica (Hamás) van llevar a los autores del asaltu israelín contra la flota solidaria énte la Corte Internacional de Xusticia (CIJ) en La Haya.

Según informó esti xueves el diariu 'Asharq al Awsat', l'alcuerdu pa trabayar xuntos contra Israel prodúxose mientres una conversación telefónica ente'l ministru de Xusticia de Turquía, Sadulá Ergin, y el so homólogu de Hamás, Muhamad Faraj al Ghoul.
  
Tamién hai informaciones de que'l profesor de Derechu alemán, y miembru del Parllamentu, Norman Paech, que taba a bordu del 'Mavi Marmara' nel momentu en que lu asaltaron, prevé presentar una demanda n'Alemaña.
  
Acordies con una información nel diariu turcu 'Zaman', los turcos intentaríen primero algamar que'l Conseyu de Seguridá de la ONU refiera'l casu ante la corte y, si esto falla, van intentar llevar la cuestión al traviés de tribunales turcos.
  
"Tienen de tomase amplies midíes llegales ante tribunales internacionales pa operar contra los mandos de la ocupación", señaló'l ministru de Hamás. Un comunicáu d'esti movimientu fechu públicu'l miércoles indicaba que'l ministru turcu sorrayare que'l so país tien determín de siguir apoyando a los residentes de la Faza de Gaza, y que Turquía ta dispuesta a pagar el preciu que suponga esti apoyu.
  
"Tamos seguros de que si tolos países árabes y musulmanes s'allinien xuntos contra la inxusticia, esto daráse por acabao rápido. Ésta ye una responsabilidá qu'heredemos de los nuesos antepasaos y que mos obliga a eliminar l'asediu inxustu de Gaza", señaló Ergin.
  
"Turquía ta dispuesta a cooperar pa revelar los crimes contra la Humanidá d'Israel", añadió. Ergin prosiguió afirmando que'l so Ministeriu va trabayar dientro de los marcos de Naciones Xuníes. "Tenemos de tar en contactu pa presentar reclamaciones llegales nos tribunales internacionales y penalizar a la ocupación israelina pol so últimu crime", aseguró.
  
Acordies con les informaciones de los medios turcos, la primer demanda sería un pidimientu de compensación pa les families de los que morrieron o resultaron firíos nel asaltu, mientres que la segunda va presentase por violación de la carta sobre operaciones marítimes n'agües internacionales, recueye'l diariu israelín 'Yedioth Ahronoth'.

Contador Estadistiques