Alcuerden eliminar les sanciones a empreses que nun usen el vascu

El Parllamentu vascu encamentó al Gobiernu autonómicu a promover los cambios normativos necesarios pa eliminar les sanciones a empreses que nun rotulen y atiendan en vascu.

La midida, que foi refugada al traviés d'una iniciativa del PSE y el PP, diba entrar en vixencia'l 17 de xunetu y qu'en dellos casos llegaben a los 600.000 euros. El testu recibió'l refugu de les formaciones nacionalistes y EB, y l'astención d'UPyD.
  
La propuesta aprobóse nel plenu ordinariu que celebraba la Cámara, na que se debatió sobre esta tema por mor d'una iniciativa orixinal d'UPyD. Esti testu, que reclamaba la "inmediata" derogación del decretu que regula les sanciones, asina como otra propuesta de la PNV que defendía'l caltenimientu de la norma, nun salieron alantre.
  
Les multes pa les empreses que nun cumplan obligaciones llingüístiques como atender y rotular nes dos llingües oficiales del País Vascu apaecen contemplaes na Llei del 2003 sobre l'Estatutu de les Persones Consumidores y Usuaries, que fixa sanciones d'ente 3.000 y 600.000 euros. Darréu, un decretu aprobáu enl 2008 desarrollaba la citada llei y fixaba los plazos y les característiques de les empreses afectaes pola norma.

8.000 empreses afeutaes
  
Les compañíes a les que se refier la normativa son les grandes cadenes comerciales y empreses de comunicación, tresporte y servicios qu'operen nel País Vascu. Los requisitos fíxense en función del tamañu y la situación de les compañíes, ente otros factores. Según delles estimaciones, habría 8.000 negocios afeutaos, que daríen trabayu a 200.000 persones.
  
El pasáu día 2, el Gobiernu vascu yá anunció la so intención de retrasar l'aplicación de les multes "hasta que la realidá sociollingüística lo aconseye". Sicasí, la iniciativa aprobada ayeri pola Cámara da un pasu más nesa dirección y encamienta al Gobiernu que "promueva los cambios normativos necesarios que permitan amparar y fomentar los derechos llingüísticos de les persones consumidores y usuaries, eliminar les midíes coercitivas y sancionadoras".
  
Nel segundu puntu de la iniciativa encamiéntase al Gobiernu que "con esi fin, estableza una moratoria d'un añu" na aplicambiocación de les sanciones, hasta que s'aprueben los citaos cambios normativos.