Chupa Chups asegura que la so decisión ye "irreversible"

Chupa Chups aseguró, tres reunise col comité d'empresa de la planta de Villamayor, que la decisión de dexar de producir  ye "irreversible" y que se trata d'una midida "estudiada abondo".

D'esta manera, la firma va centralizar tola producción de carambelu con palu nel so centru de Sant Esteve Sesrovires (Barcelona), cola "fin de garantizar la competitividá de la compañía y poder caltener asina la producción de Chupa Chups n'España".
  
De la mesma, la empresa "reafirmó la so voluntá decidida" de tratar esti procesu col fin d'atopar soluciones pa los 121 collaboradores afectaos, al traviés d'un plan social que presentó güei a los representantes llegales de los trabayadores.
  
Ente otres midíes, contémplase'l treslláu a Sant Esteve d'una parte importante de la plantiya, asina como midíes d'acompañamientu mientres tol procesu.
  
La empresa argumenta que l'adopción d'esta decisión respuende a la necesidá d'adautar la capacidá productiva a la demanda del mercáu global, "lo qu'obligó a la compañía a racionalizar la so estructura industrial n'España".
  
Tres esta operación, la estructura de Chupa Chups n'España va quedar formada pola planta de Sant Esteve Sesrovires, que se va especializar na producción de carambelu con palu con destín al mercáu nacional y internacional, y la planta de Villafranca de Ebro (Zaragoza), dedicada a la fabricación de comprimíos.