Activen el plan d'inundaciones pola aguada

El Xerente de 112 Asturies declaró l'activación del Plan d'Inundaciones d'Asturies en Situación 0 a les 2.51 hores. El país rexistró más un centenar d'incidentes pola aguada.

Esti nivel supón que toles incidencies tán siendo controlaes colos medios y recursos de les árees afeutaes. L'activación vien ante la situación xenerada pola aguada cayida mientres les últimes hores n'Asturies, con numberosos incidentes, fundamentalmente nos  conceyos costeros de Gozón, Carreño y Avilés, y daes les predicciones meteorolóxiques ellaboraes pola Axencia Estatal de Meteoroloxía, con previsión de fuertes agües mientres el día de güei.
 
Dende les 22.00 hores d'ayeri miércoles día 9, hasta les 05.00 hores de güei xueves, el 112 Asturies rexistró un centenar d'incidentes rellacionaos con inundaciones. El conceyu de Gozón con 36 incidentes, siguíu de Carreño con 13, y Avilés con 14, foron los conceyos más afectaos. Amás, cabe señalar que'l 112-Asturies alertó en 29 ocasiones a los servicios d'emerxencies de Xixón por incidencies d'esti tipu.  
  
La mayor parte de les emerxencies tuvieron rellacionaes con insundaciones de baxos, viviendes o cortes de carretera, como'l de l'As-238 dende la salida de Valliniello a Lluanco, anque, cabe destacar que los servicios d'emerxencies tuvieron que rescatar a delles persones que quedaron aisllaes pol agua nel conceyu de Gozón.
  
Asina, hubo que desagospiar a seis persones del Restaurante Molín del Puerto. Darréu, ún de los afeutaos empezó a quexase de dolor nel pechu y solicitóse la intervención del Helicópteru de Salvamentu Marítimu pa la so evacuación al Hospital de Xove. Tamién s'evacuó a un home que llograre subise al teyáu de la vivienda en Bañugues. Al afeutáu rescatólu l'Helicópteru de Salvamentu Marítimu que lu treslladó hasta la so base en Xixón.
  
A otros seis persones que s'alcontraben nel teyáu del chigre de la playa de Verdicio en Gozón tamién les desagospiaron volutarios de l'Agrupación de Protección Civil del conceyu. Amás, hubo que rescatar a animales na población de Budores, ente Verdicio y Mazaneda. Los bomberos llograron evacuar delles reses que taben atrapaes nuna corte. Na esplotación había unes 100 vaques.
  
El Centru de Coordinación d'Emerxencies del 112-Asturies movilizó a efectivos de Bomberos d'Asturies con base nos parques d'Avilés, Pravia, Proaza y La Morgal.  Nes intervenciones tamién participa'l Xefe Supervisor y el Xefe de la Zona Centru de Bomberos d'Asturies, y el Grupu de Bucéu (Goresa) de la Entidá.
  
A primer hora de la mañana, sumóse al dispositivu'l Grupu de Rescate col Helicópteru Medicalizáu de la Entidá. Al operativu de Bomberos d'Asturies súmense efectivos de la Guardia Civil, Policía Llocal, Cruz Roxa y voluntarios de Protección Civil, amás de los efectivos de Salvamentu Marítimu.  
  
En tou momentu, la Dirección d'Interior y Seguridá Pública caltuvo permanente contactu colos alcaldes de los conceyos afectaos pa informalos de la situación. Por cuenta de l'activación del Plan, nes instalaciones de La Morgal constituyóse'l Centru de Coordinación Operativa (CECOP) del que formen parte, amás del personal de coordinación, el Xerente de la Entidá, el Xefe de la Área de Coordinación y el Xefe Supervisor de Bomberos d'Asturies.