Iris Díaz Tracho presenta 'Mio ma, la pirata' en Xixón

Güei xueves 10, va presentase ‘Mio ma, la pirata’ d’Iris Díaz Trancho y la ilustradora Gloria Caamaño. Col títulu, Suburbia Ediciones inagura la colección infantil ‘Camín de Bre’.

‘Mio ma, la pirata’ ye una hestoria de pirates anque atípica: Barba Negra lleva un restaurante y Barba Roxa ye xastre. La ma del nenu protagonista sigue surcando los mares buscando barcos que prindar y ayalgues escondíes. Con ayuda de la perra Pulga entamen un viaxe a Madagascar en busca del mayor tesoru de toos. L’actu va entamar a les 19.30 hores nel Antiguu Institutu de Xixón y tará presentáu pol tamién escritor Xulio Berros.
 
Iris Díaz Trancho (Xixón, 1981). Una de les nueves voces de la narrativa asturiana. Especializada en lliteratura infantil, con 'La caxa de cristal' ganó’l Concursu de Llectures pa Rapazos de l’Academia de la Llingua en 2004. Llogrótamién el primer premiu del Concursu de Cuentos Curtios de la Tertulia Cultural ‘El Garrapiellu’ en 2005 cola obra ‘Sedna’. Suya ye la novela 'La neña de les trences al revés' (Ediciones Trabe, 2006). Tamién collaboró nel volumen 'Asturies Cuenta' de la editorial Suburbia.