Cultura presenta les obres ganadores de los ‘Asturias Joven’

La Conseyera de Cultura presentó les obres ganadores del Premiu ‘Asturias Joven’ de Narrativa, Testos Teatrales y Poesía, del que foi ganadora la obra n’asturianu ‘Los dioses de Curtis’.

Mercédez Álvarez asistió ayeri n'Uviéu a la presentación de les publicaciones ganadores. Tamién asistieron, al par de los autores premiaos, el Direutor del Institutu Asturianu de la Mocedá, Guillermo Martínez Suárez; el Direutor de Relaciones Institucionales y Asuntos Sociales de Caxastur, César Menéndez Claverol: entidá patrocinadora del eventu, miembros del xuráu y responsables de KRK Ediciones, editorial responsable de les publicaciones premiaes.

El Premiu ‘Asturias Jovén’ de Poesía, Narrativa y Testos Teatrales ta dotáu con cinco mil euros pa cauna de les modalidaes ya inclúi la publicación de los trabayos ganadores na Colección Texu. Na convocatoria de 2009, participaron 52 mozos, 23 más que na edición anterior. El xuráu tuvo formáu por Jordi Doce, Fernando Beltrán, Xuan Bello, Eva Mar Santurio y Adolfo Camilo Díaz.

Los ganador de la última foron Sergio Gutiérrez Camblor, pol poemariu n’asturianu ‘Los dioses de Curtis”; Juan Folguera en Narrativa por ‘Historias de la fortaleza”, y Rosario Hernández Catalán, por ‘Chernobil, paraíso natural’, en Testos Teatrales.

Sergio Gutiérrez Camblor (Lieres, Siero, 1985) ye autor d'un únicu poemariu publicáu por Trabe, “A dixo a B: perversu”, y participó en diversos llibros coleutivos. Según el xuráu, ‘Los dioses de Curtis’ destaca pola unidá y coherencia del mundu que presenta, la so mirada caltriante y ensin concesiones, con toques d'ironía, y un llinguaxe depuráu, concisu, con fuerza espresivo, nel que lo llírico y lo prosaico conviven ensin fisures. “Trátase d'un poemariu arriesgáu, con carauter, que nos amuesa una voz distinta y personal”, indicaron.

Según recordó la Conseyera de Cultura y Turismu na so intervención, la Colección Texu  convirtióse, col pasu del tiempu, nuna importante amuesa de la lliteratura asturiana más moza, axuntando los llibros de tolos premiaos y na cual tán publicaes obres de dalgunos de los meyores escritores de la última xeneración, como José Luis Piquero, Martín López Vega, Jordi Doce, Ricardo Menéndez Salmón, Francisco Ignacio del Valle, Pablo Rodríguez Medina, Ismael Piñera, Chus Fernández, Jon Bilbao, Sofía Castañón, Miguel Barrero y David Barreiro.