La Conseyería d'Educación apuesta pola llingua (inglesa)

La Conseyería d'Educación y Ciencia pon en marcha'l Campus de Branu 2010 con actividaes educatives y lúdiques p'ameyorar l'aprendizaxe del inglés ente’l alumnáu de Primaria y de ESO.

Los campus formativos, dotaos con 303 places, son gratuitos y van celebrase en Colunga ya Ibias (estancies completes), Les Regueras y Uviéu (con torna diaria a la casa). Trátase d'actividaes educatives nes que s'integra la práctica de la llingua inglesa en talleres y actividaes lúdiques y deportives.

Ufierten un conxuntu d'actividaes que combinen la práctica de la llingua inglesa con actividaes d'aventura, d'ociu y tiempu llibre. Van utilizase les instalaciones de centros educativos (aules, instalaciones deportives, cuartos, etc.), instalaciones municipales y de la redolada natural de los conceyos.

Les actividaes de branu complementen les iniciatives que la Conseyería d'Educación y Ciencia empobina mientres el cursu escolar col envís d'ameyorar la competencia del alumnáu n'idiomes. ‘Secciones Bilingües’ ye la iniciativa más importante, un programa qu'arrincó nel cursu 2004/05 en  siete institutos y que na actualidá ta executándose en 173 centros educativos (97 de Primaria, 54 de Secundaria y 22 centros concertaos).

Dende la Conseyería, recuerden que les ‘Secciones Bilingües’ suponen aumentar les hores de clase en llingua estranxera ya incorporar la enseñanza del inglés o francés a distintos conteníos curriculares.