La Sindicatura detecta "series debilidaes" nel control municipal de la xestión del suelu

La Sindicatura de Cuentes aprecia "series debilidaes" nel control internu sobre la xestión del Patrimoniu Municipal del Suelu nos siete conceyos que tienen más de 20.000 habitantes.

Esos conceyos son Uviéu, Xixón, Avilés, Siero, Llangréu, Mieres y Castrillón. La más significativa d'eses debilidaes ye "la falta de procedimientos de coordinación ente tolos servicios vinculaos a la xestión de los bienes y derechos integrantes del PMS".
 
Asina consta nel informe definitivu de fiscalización sobre los Bienes y Derechos integrantes del Patrimoniu Municipal del Suelu, correspondientes al exerciciu 2005. El trabayu forma parte del programa de fiscalizaciones del 2008.

  
El trabayu pretende comprobar si'l PMS de los conceyos escoyíos xestionóse acordies con la lexislación. Tamién evalúa si s'utilizáu como instrumentu d'intervención nel mercáu del suelu pa facer posible el desarrollu del planiamientu xeneral de los conceyos y evitar la especulación, según indicó la Sindicatura al traviés d'una nota prensa.
  
Nel capítulu de les observaciones, l'órganu fiscalizador señala que, contra lo establecío na normativa, nengún de los siete conceyos analizaos tenía constituyíu formal nin materialmente l'inventariu de bienes y derechos del PMS. La Sindicatura encamienta a los conceyos a cumplir esi requisitu.
  
La principal fonte de recursos del PMS yera la enayenadura de terrenos que yá formaben parte del Patrimoniu Municipal del Suelu. Amás, nos siete conceyos, el 12% de los destinos daos al PMS nun s'axustó a les finalidaes previstes llegalmente. Un 31% dedicóse a dotaciones urbanístiques y un porcentaxe bastante menor, un 7%, a la promoción de viviendes suxetes a algún réxime de protección.
  
Amás, la Sindicatura detectó que los conceyos utilicen como práctica xeneralizada recibir l'equivalente monetariu de los aprovechamientos urbanísticos, en cuenta de la cesión en terrenos.
  
A lo último, la Sindicatura considera que los conceyos tienen de velar pol correctu usu y destín de los bienes del PMS y que toles operaciones que-y afecten han tar "meyor documentadas" y tamién tienen d'acreditase bien la so necesidá y finalidá.