La Universidá señala la "aceptable calidá del aire" na zona de Coxersa

Según la Universidá d'Uviéu, los parámetros de la zona na que ta Coxersa son "razonables" y que se da una "aceptable calidá del aire", presentándose'l golor de forma irregular.

El coordinador del estudiu d'impactu ambiental de La Zoreda, el catedráticu Julio L. Bueno de las Heras, refugó amás que seya inevitable que la futura incineradora tenga un impactu adicional sobre la zona. Sicasí, anunció que se va contar con un equipu técnicu pa examinar dioxines y evaluar si hai incidencies.
  
Na presentación del informe en Coxersa tuvo tamién el conseyeru de Infraestructures y Mediu Ambiente, Francisco González Buendía. Respecto al estudiu, denomáu 'Zoreda-Zero', el responsable autonómicu indicó mientres la presentación que fuera "bien concienzudu" y que lu entamó nel 2007 un equipu multidisciplinar de la Universidá. El conseyeru destacó'l "cuidáu esquisitu" de Coxersa nes sos actuaciones, anque matizó que "tou cuidáu ye poco".
  
Por esti motivu realízase l'informe, pa que se sepa cuál ye l'estáu real de la zona y que "nun vengan determinaos paracaidistes a contaminar la opinión pública". Coles mesmes, aseguró que se van tomar toles midíes y va utilizase tecnoloxía punta pa evitar efectos adicionales.
  
Pel so llau, Bueno resaltó que l'estudiu realizóse con total llibertá, con un financiamientu adautáu a oxetivos y con grandes facilidaes tanto de Coxersa como de los vecinos del entornu. "D'entrada'l paciente ta bien", dixo. Na so opinión, cualquier esviación de los parámetros actuales va poder percibise.
  
L'estudiu fízose dende febreru del 2007 a marzu d'anguaño, con un presupuestu de 245.000 euros, de los que 50.000 emplegáronse na compra d'equipos de rexistros de datos.
  
Anque se dexa claro que la decisión d'instalar Coxersa na Zoreda foi "técnicamente xustificada", tamién se reconoz el so impactu negativu con una degradación ambiental "moderada", anque "amenorgáu" por polítiques d'información, de compensación y d'implicación.
  
Coles mesmes, constatóse la "buena salú del arboláu" y ausencies esperables vinculaes a la deforestación no que se refier a la fauna, con escasa presencia de delles especies, como l'azor -d'interés especial--, esguiles, víbora, xaronques o salmón, por casu.
  
Tamién s'aprecia una "aceptable calidá del aire, que namás presenta esceiciones puntuales y incidentales que puen xustificase en bona midida", reflexa l'estudiu, mientres que no referente al aerosol captáu o sedimentu, los niveles tán perbaxo de los valores d'alarma. Amás, son baxos los niveles de la familia dioxines y PCBs topaos nel aire y nun pue considerase que'l suelu tea contamináu con metales consideraos tóxicos.
  
Sobre'l ruiu, los niveles más altos correspuéndense a los producíos na autopista y en ciertes operaciones na zona de materiales de construcción de Coxersa. En cuanto al golor, preséntase de forma irregular, con añadíos de contribuciones típiques de les práctiques ganaderes -cuchu y purinos-, anque con más presencia nes mesmes instalaciones.
  
Tamién nel entornu de Villabona percíbese una componente pútrida de golor posiblemente vinculada a la instalación de depuración d'agües residuales de baxa eficacia pa los requerimientos actuales. Por too ello, plantégase instalar sistemes d'apantallamientu y otres midíes paliativas de los efectos, asina como la puesta en marcha de plantes como la incineradora.

Control de dioxines
  
Bueno esplicó que la Universidá va mercar unos equipos con cargu a fondos del Principáu d'analís de detección de dioxines, que van permitir a la institución ser autónoma y contar con esos aparatos nel Campus de Mieres p'analizar la sustancia "que más preocupa a la xente".
  
Tamién indicó que más que ver lo que pue meyorase del entornu, lo qu'interesa ye que lo que venga d'equí p'arriba puea controlase. A esto unió'l que la rede que se constituyó pa facer l'estudiu puea siguir como rede de siguimientu pa determinar en tiempu real si hai alguna esviación al respecto de la llinia base marcada con esti informe. Sicasí, alertó que cualquier esviación qu'haya nel futuru va tener que ver si ye imputable a la incineradora o non.
  
Sicasí, añadió que "too ye meyorable", pero argumentó qu'hai que ver hasta qué puntu los gastos puen tar xustificaos. Na so opinión, sobre Coxersa hai una serie d'industries y actividaes diverses, asina como autopistes, polo que sería un llabor conxuntu de toos el meyorar el mediu ambiente de la zona.
  
Coles mesmes, destacó que l'oxetivu de la incineradora tendría de ser "incidencia cero". Al so xuiciu, nun ye tecnolóxicamente imposible, y comparó la situación cola d'un hospital, nel que ye más fácil atopar un microbiu que nun parque. Pa él, lo importante ye caltener los parámetros actuales y controlar cualquier esviación. "Entós que la sociedá xulgue qué esviación ta dispuesta a tolerar", apuntó.

Fuera d'oportunismu políticu
  
Con él tuvo'l conseyeru d'Infraestructures, Francisco González Buendía, que tachó de "babayada" que Bloque por Asturies diga que la incineradora nun se va facer por falta de dineru. Según él, si se planiara en función de los recursos del día a día taríamos "inmovilizaos en tolos aspectos de la política". Nesti momentu ta trabayándose na planificación  urbanística per una parte, na técnica tamién y nos pliegos, ente otres coses.
  
Buendía recordó que'l plazu dau a la incineradora ye de 70 meses y que se va dir pasu a pasu per tolos trámites, medioambientales, urbanísticos, con periodos informativos y de participación pública, pa llegar al 2015 con esa solución. "Que naide ente al remate del oportunismu políticu de la crisis porque realmente ye una decisión de futuru que tien que tomase y yá se tomó", aseguró.
  
Tamién incidió en que l'estudiu realizólu una entidá de total confianza pa los asturianos, y gracies a él podrá vese l'impactu real que tien la incineradora una vez que tea en marcha.
  
Ésti señaló qu'onde más impactu pue producise pero dientro de les llendes llegales admitibles ye nes mesmes instalaciones de Coxersa, pa lo que se tán aplicando midíes correctores y va siguir faciéndose.
  
Buendía calcó en que tamos nun centru de tratamientu de residuos y non nun parque natural. "Que naide se vuelva llocu, nun vamos tornar esto nun parque natural", añadió. El conseyeru indicó que'l centru ye modélicu pal país y que se va siguir actuando dientro de los parámetros de la llegalidá.
  
Per otru llau, recordó qu'ayeri se celebró en Madrid la conferencia sectorial cola ministra de Mediu Ambiente, Elena Espinosa, na que se trató l'anteproyectu de la Llei de Residuos pa la tresposición de la Directiva Europea y na que quedó claro que la planta de valorización enerxética ye ún de los elementos d'eliminación de residuos almitíu pola UE y por toles Comunidaes Autónomes españoles, "del color que seyan", repostió.
  
Buendía apostó por nun ser utópicos y señaló que por muncho que se meyore nes trés 'R' (Reducir, Reutilizar y Reciclar) y anque Asturies se ponga a la cabeza mundial nesti aspectu, siempre va haber una fracción resto, a la qu'hai que dar solución. "L'alderique ta superáu pa nós", apuntó.