Xuristes diz que nun tien nada que ver col documentu de Mercator

Depués de la espublización del testu d’Héctor Xil, Xuristes pol Asturianu diz qu'anque l'asociación apaeza nos agradecimientos, nun comparten les hipótesis del documentu.

Mercator, institución de la Xunión Europea, acaba de publicar ‘L’asturiano-llionés, aspeutos llingüísticos, sociollingüísticos y llexislación’ del filólogu lleonés Hector García Xil. L’Aconceyamientu de Xuristes pol Asturianu diz, tres apaecer nos agradecimientos del documentu, que nun tien nada que ver coles hipótesis y afirmaciones que nel mesmu se faen, “siendo la realidá xustamente tolo contrario”.

“De mano, l’autor nun contautó enxamás con nós. Quien lo fixo foi Manel Rodríguez Pérez-Caudel pa, tres presentáse como coordinador de Mercator, encamentar la nuesa opinión sobre un documentu rellativu a la llingua “asturiano-lleonesa-mirandesa” (sic.)”, afirmen.

L’Aconceyamientu diz que valora’l meritu del trabayu, pero que tresmitió al coordinador de Mercator que calificar, como fai’l documentu, de gallegu a la fala eonaviega, de montañés al asturianu del oriente d’Asturies y occidente de Cantabria, “ye confirmar con nuevu nome a una llingua, l’asturiana, a la que yá-y punxeron abondos nomes nel bautizu”. Al empar, afirmen que llamar a la llingua como asturllionesa ye lo mesmo que si llamáremos al catalán “llengua catalanovalenciana”.

Tamién solliñen que’l documentu  ta “atarricando optimismu progubernamental” al calificar de ‘cooficilidá parcial’ la situación llegal del asturianu. “Lo que la llingua asturiana tien algamao ye la reconocencia xurídica y social de la so condición de llingua, perdiscutida hasta va poco. Ye un pasu porque darréu vien la desixencia de proteición y el derechu fundamental al so emplegu, que ye bien difícil negar nun Estáu que quier pasar por democráticu. Pero, anguaño, d'oficialidá, que ye lo mesmo que dicir d'emplegu activu polos poderes públicos, nin traces”, sentenció Xuristes.

Por too ello, el secretariu de l’asociación, Xurde Blanco, diz qu’al Aconceyamientu nun-yos fai gracia nenguna, “nin el conteníu del informe, nin les gracies que mos dan”.