Israel diz que nun va dexar pasar nengún barcu iranín a Gaza

Israel nun va  permitir la llegada a la Faza de Gaza de nengún barcu iranín con ayuda humanitaria pol riesgu de que tamién lleve armes, afirmó un dirixente citáu pol diariu Jerusalem Post.

Ye la respuesta a lo dicho pola Media Lluna Colorada iranina, qu'anunció esti llunes que nos próximos díes fletaría dos buques con ayuda humanitaria y material sanitario p'auxiliar a la población gazací, que dende mediaos del 2007, cuando'l Grupu de Resistencia Islámica (Hamás) se fizo col poder nel territoriu, sufre un duru bloquéu terrestre y marítimu per parte d'Israel.

"El réxime iranín fizo llamaos a la eliminación d'Israel, y esisten pruebes que demuestren qu'envió armes a Hamás y Hezbolá (el partíu-guerrilla chií libanés que s'enfrentó a Israel na guerra de branu del 2006)", afirmó esti dirixente, que non identificáu pol rotativu israelín.
  
"Si nun dexamos pasar a un barcu irlandés (en referencia al buque 'Rachel Corrie', al que se-y torgó llevar la so carga humanitaria a la Faza), muncho menos dexarémos el pasu a barcos iraninos", añadió.
  
Esti encruz de declaraciones prodúxose dempués de que'l pasáu día 31 de mayu comandos d'élite israelines asaltaren un buque turcu qu'encabezaba una flota d'activistes pro palestinos, col oxetivu de romper el bloquéu marítimu del enclave mediterráneu y facer llegar a los gazacís la so ayuda humanitaria.
  
Por cuenta d'esta interceptación morrieron nueve ciudadanos turcos, ún de los cuálos tenía tamién la nacionalidá estadounidense. Per otru llau, hai un númberu indetermináu de firíos. Esti episodiu provocó una abalancha de crítiques sin precedentes contra Israel, pese a qu'esti país xustifica la durez de la so respuesta afirmando que los miembros de la flota teníen nexos con Hamás y qu'agredieron duramente a los soldaos qu'asaltaron el so buque.