La próxima Selmana de les Lletres recordará a Manfer de la Llera

La conseyera de Cultura y Turismu, Mercedes Álvarez, anunció que la próxima Selmana de les Lletres Asturianes va celebrase en Llangréu y va centrase na figura de Mánfer de la Llera.

La representante autonómica informó d'esta elección de sede pa la próxima cita coles lletres asturianes mientres una visita al Conceyu. Álvarez señaló que se trata d'una sorpresa pa l'alcaldesa" que, según dixo, "yá mostrare interés nesti sen". La mesma primer edil, Esther Díaz, mostróse encantada cola noticia y destacó'l llabor que se realiza nel conceyu en favor de la llingua.
   
La conseyera de Cultura, acompañada del director xeneral de Turismu y Patrimoniu Cultural, José Luis Vega, acudió al consistoriu llangreanu a roblar cola responsable municipal dos convenios. Ún d'ellos centráu na cesión per parte del Principáu d'un paquete de documentación y material cinematográficu, que va depositase nel Cine Felgueroso de Sama.
 
Mineru y escritor, ponte ente xeneraciones

Manuel d’Andrés Fernández, más conocíu pol alcuñu lliterariu de Manfer de La Llera, mineru, poeta y narrador n'asturianu, ñació en Les Cuestes de Ciañu, Llangréu, en 1918. Ye autor de cuatro llibros onde combina la prosa col versu: ‘Cuentos en verso asturiano’ (1953), ‘Cielo bajo tierra’ (1982), ‘Garrapiellu lliterariu asturianu’ (1983), y ‘Cabalgando sol tiempu’. (1990).

Empieza a dase a conocer como escritor de monólogos humorísticos y poesía costumista, col tipu de lliteratura que s’estilaba nos años de la postguerra, cuando Manfer de la Llera publica los sos primeros versos. Más tarde interésarase pol tema de la mina, sobre’l que traten la mayoría de los sos llibros; nellos xunta la denuncia social, la reivindicación de la llingua y la quexa esistencialista en formes poemátiques que d’avezu s’alleguen a la prosa. Bona parte de los sos escritos publicáronse en prensa periódica asturiana y cartafueyos de fiestes del so Llangréu natal.  
 
Yera miembru de l’Academia de la Llingua Asturiana y padre de dos escritores n'asturianu: Vital y Ramón d'Andrés, que foi direutor de la Oficina de Política Llingüística la pasada llexislatura.

Con ésti últimu escribió Manfer de la Llera un ‘Vocabulariu asturianu de la mina’, publicáu por Alborá en 1997. En 1998 apaez na antoloxía ‘El cuentu asturianu tres la guerra’ d'Antón García, qu’axunta los más destacaos narradores asturianos de posguerra y publica ‘Coses vivíes’, llibru d’alcordanza onde recueye venti vivencies de los duros tiempos d’enantes y dempués de la guerra.

Manfer de la Llera foi escritor que sirvió de ponte ente la lliteratura costumista y el Surdimientu, participando activamente col procesu de recuperación llingüística qu’entamó n’Asturies en 1974, cola fundación de Conceyu Bable. L’esctitor morrió en Xixón en mayu de 2005, víctima d’un cáncer que nun-y permitió celebrar el so 87 cumpleaños.