Recrea diz que La Llaboral nun veta a artistes y compañíes asturianes

El direutor xerente de Recrea, Alejandro Calvo, dixo que son los artistes, promotores y compañíes les que tienen que proponer lo que quieren ofrecer al Teatru de La Llaboral y non viceversa.

Calvo dixo amás que nun esiste nengún comité de sabios qu'asesoren sobre la programación de Llaboral Escena y poro nun tienen nengún costu. Dixo amás que la Empresa Xestión d'Infraestructures Culturales, Turístiques y Deportives del Principáu d'Asturies, S.A.O., Recrea, ye una sociedá de xestión que nun tien capacidá de financiase y poro tampoco tien númberos coloraos. "Nun perdemos nin tiramos dineru, sinón que va a la economía llocal agospiu d'artistes, productores, tresporte y demás--", dixo Calvo.
  
Afirmó que Recrea respondió a toes y caúna de les reclamaciones del Parllamentu, ta auditada y amás saca a concursu caún de los proyectos. "Nun hai perdes nin númberos coloraos, porque nun pue financiase nin pue ser deficitaria". Negó amás que nun tenga en cuenta a los creadores y compañíes asturianes y pidió al PP que "la so obcecación nun-yos torgue ver lo que foi Llaboral nestos trés años".
  
Calvo compareció güei en comisión a pidimientu del PP pa qu'informare de tolos estremos relacionaos cola programación y espectáculos celebraos por Llaboral Escena, correspondientes al teatru de la Universidá Llaboral dende la inauguración del mesmu.
  
Dixo que'l Teatru de La Llaboral basó la so propuesta nes artes y creación contemporanea por dellos motivos. Per una parte completó la ufierta esistente n'Asturies, amás por ser una plataforma pa conocer per parte de ceadores y públicu obres que namás llegaben a capitales y que faen qu'Asturies dexe de tar aisllada nesi aspectu.
  
Esplicó qu'en tres años el Teatru de La Llaboral consolidóse y ocupa yá un llugar resaltáu y amás cuenta cada vez con mayor públicu, llogrando un 60% d'aforu nes distintes programaciones.
  
Na so intervención esplicó'l llabor que Recrea tien encamentáu nel recintu de la Universidá Llaboral y que va dende la xestión de los visitantes y turistes a l'actividá congresual de les instalaciones. "Dende Recrea facemos que La Llaboral funcione", dixo, y recordó que más de 4.000 persones pasen a diariu pel complexu.
  
El diputáu del PP, Emilio Pérez Cueva, manifestó que'l so grupu piensa lo mesmo de Llaboral Escena que "la mayoría de los profesionales asturianos y de los ciudadanos polo xeneral", y preguntóse si les partíes millonaries que se destinen a espacios de cultura minoritarios, Llaboral Escena y Llaboral Centru d'Arte son o non necesarios.
  
"Si l'aforu del que fala ye namás la caxa escénica, nun m'estraña que llegue al 60%. El so añu de xestión ta pasando con más pena que gloria, pol so silenciu y por permitir siguir alantre dando vida a algo que yá nació muertu", dixo'l diputáu del PP, qu'añadió qu'en casi'l 90% de lo programao en trés año nun se llega al centenar de persones qu'acuden a los mesmos.
  
Asina dixo que'l 'Festival de la palabra', ún de los principales proyectos, sumó menos de 400 espectadores en trés díes y refirióse "al espilfarru" que se produz en La Llaboral con dineru público. Calificó de "solemne babayada lo que faen con La Llaboral" y pidió que dexen de facer esperimentos cola situación de crisis que se ta viviendo.
  
Pérez Cueva pidió a Calvo que torgue que Llaboral torne nel campusantu faraónicu del arte n'Asturies. "El que foi'l proyectu estrella d'Areces dirixíu dende'l so 'despachón' namás valió pa xenerar dudes pol so espilfarru", dixo, y añadió que La Llaboral "nun val nin como chiringu".
  
Pela so parte, el diputáu d'IU-BA-Verdes, Roberto Colunga, consideró que la realidá de la crisis fai más necesario que nunca reordenar los recursos destinaos a la cultura.