Asturies va recibir 600.000 euros pa subvenciones nos Picos d'Europa

Asturies va recibir casi 600.000 euros pa los Picos d’Europa y 10 millones pa la Rede Natura. Amás, la Conferencia sectorial dio'l vistu bonu a la reintroducción del frañagüesos nos Picos.

El Conseyeru de Mediu Ambiente, Ordenación del Territoriu ya Infraestructures, Francisco González Buendía, asistió esta mañana en Madrid a la xunta de la Conferencia Sectorial de Mediu Ambiente, que tuvo presidida pola Ministra de Mediu Ambiente, y Mediu Rural y Marín, Elena Pérez Espinosa.

Unu de les temes trataos foi'l de les compensaciones socioeconómicas a les árees d'influencia de los Parques Nacionales pal añu 2010, que va cuntar con un presupuestu total de 9.127.000 euros, de los qu'Asturies va recibir 593.912 euros. N'Asturies, estes subvenciones dixébranse en tres estayes: a entidaes locales (inclúi los Conceyos y Parroquies de los conceyos d’Onís, Cangues d'Onís, Cabrales, Peñamellera Baxa y Amieva); a empreses, y a particulares o asociaciones. En 2009, subvencionáronse un total de 33 proyeutos ente les tres llinies d'ayudes.

Per otra parte, mientres la xunta tamién se pasó revista al desenvolvimientu y execución de los convenios que tienen roblaos les Comunidaes Autónomes pa realizar actuaciones de caltenimientu n'espacios de la Rede Natura 2000 y que tán financiaos con fondos FEDER. Nel casu d'Asturies, l'alcuerdu preve una inversión de más de 10 millones d'euros ente 2010 a 2012. Los proyeutos propónlos la comunidá autónoma y execútalos el Ministeriu baxu supervisión técnica de la comunidá..   

Dalgunos de los proyeutos que ta previstu desenvolver nesti exerciciu son la Casa del Llobu en Balmonte: Centru d'Interpretación dedicáu a la especie y a los Llugares d'Importancia Comuñal (LIC) de Peña Manteca y Montoso; l'Ampliación de la Casa de l'Agua en Sobrescobiu; el Centru d'Interpretación Cabu Peñes en Gozón; meyora d'hábitat oseru en L.lena y Ayer; y meyora del hábitat del gallu montés en Fontes del Narcea  y nel Parque Natural de Ponga”.

Actuaciones de recuperación d'especies amenazaes

A lo último, repasaron la cuantía que van recibir les Comunidaes Autónomes pa realizar actuaciones de caltenimientu y recuperación d'especies amenazaes. Nel casu d'Asturies la previsión ye de cuntar con unos 107.000 euros pal próximu añu.

No qu'afeuta a Asturies, la Sectorial de Mediu Ambiente dio'l vistu bonu a la reintroducción del frañagüesos en Picos d'Europa. La previsión ye soltar dos pollos en Picos, una vegada que se reciba'l vistu bonu técnicu del grupu de trabayu de la Comisión de Patrimoniu Natural y Biodiversidá del Ministeriu.