Francia ufre la mediación de la XE pa supervisar los unvíos a Gaza

El ministru d'Asuntos Esteriores francés, Bernard Kouchner, ufrió la collaboración de la XE pa facer llegar a Gaza ayuda humanitaria que supervisaría pa torgar la introducción d'armes.

Kouchner formuló esta propuesta nun momentu en que, tres l'asaltu israelín de la selmana pasada a la flota de cooperantes pro palestinos, que se saldó cola muerte de nueve d'ellos, numberoses voces, algunes del propiu Israel, piden el fin del bloquéu qu'esti país somete a la Faza de Gaza.

"Proponemos otra vuelta que la Unión Europea, que los países europeos, supervisen estos unvíos de manera estricta", afirmó Kouchner en calteniendo una xunta col so homólogu británicu, William Hague.  
  
"Podemos supervisar de forma satisfactoria los unvíos navales haza Gaza. Podemos facelo, prestábamos facelo y fairíamoslo con gustu", afirmó'l titular d'Esteriores francés, qu'añadió que la situación actual na Faza ye "insostenible".
  
Francia y Reinu Xuníu yá fixeron una propuesta bien asemeyada, que contemplaba l'unvíu de buques de guerra a la zona pa supervisar les esportaciones a Gaza, a primeros del 2009 tres acabar la operación 'Plomu Fundíu', na que l'Exércitu israelín bombardió mientres 22 díes l'enlcave gazacín, acabando cola vida d'unos 1.300 palestinos, en respuesta pol llanzamientu de cohetes contra'l so territoriu.
  
Hasta'l 2007, cuando l'operativu quedó suspendíu por razones de seguridá, funcionarios de la Xunión Europea supervisaron les remeses al traviés del pasu de Rafah, que comunica la Faza con Exiptu. A pesar de que na práctica esta misión nun se ta realizando, los líderes de la XE prollongaron el so mandatu un añu más hai unos meses.
  
Pela so parte, Hague, que ta realizando una xira per Europa que lu va llevar a Roma, Berlín y Varsovia, afirmó que caltuviere un gran númberu de conversaciones colos sos homólogos de la XE sobre cómo facer posible l'envíu de material humanitariu a la Faza y el restablecimientu de los fluxos económicos normales, evitando que pudieren llegar más armes a Gaza.
  
"Pienso que la XE pue ayudar nesti tema como yá lo fixo nel pasáu", afirmó'l mandatariu británicu, que remarcó amás la importancia de "que se constituya una comisión imparcial y creíble" qu'investigue l'asaltu israelín al buque turcu 'Mavi Marmara', nel que morrieron los nueve cooperantes. Trátase d'una iniciativa a la qu'Israel yá mostró'l so refugu al traviés del so embaxador en Washington.