La ReFLEXón busca agospiamientu

L’asamblea de La ReFLEXón denuncia que l’edificiu qu’ocuparon ye un sumideru de suciedá. Del mesmu mou, afirmen que busquen un llugar pa llevar alantre’l so proyeutu.

Fai un añu qu’un xulgáu de Xixón dictaba sentencia sobre’l desaloxu de la nave qu’albergó les instalaciones de la fábrica Flex nel barriu de La Calzada, y que’l 11 de xunetu de 2008, foi ocupada pa convertise nel Centro Social Okupáu y Autoxestináu La ReFLEXón. En dicha sentencia, la xueza encargada del casu ordenaba desaloxar l’edificiu pa devolve-ylo al so llexítimu dueñu, Construcciones Llorente SL.

Dende aquel 5 de Xunu de 2009, les instalaciones de la Flex acoyeron durante 11 meses charres, talleres, conciertos, proyeiciones cinematográfiques, xintes populares, recitales de poesía…  Sicasí, según denuncien, anguaño’l centru vuelve ser un sumideru de suciedá y abandonu.

“La solidaridá y el trabayu en comuña dieron pasu de nuevu al abandonu y la especulación, gracies al interés, o desinterés, según se mire, de Construcciones Llorente y de la mal llamada Xusticia”, señalen.

Afirmen que siguen buscando sitios afayadizos pa denunciar la especulación inmobiliaria y llevar alantre’l so proyeutu anticapitalista. Asina, ocuparon simbólicamente un edificiu na Cai Los Moros pa festexar l’aniversariu del proyeutu.

“La búsqueda continúa, porque son innumerables los edificios qu’hai en Xixón abandonaos a la espera de tiempos meyores pa los intereses especulativos, y más que va haber de siguir estos tiempos de recortes sociales, desemplegu y precariedá, siguiremos denunciando la especulación inmobiliaria y lo inxusto d’esti sistema capitalista”, apunten pa finar.