El PP presenta una proposición pa realmitir a El Ferreiro

La Mesa de la Cámara de la Xunta Xeneral almitió a trámite una proposición non de llei del Grupu popular que pide la "inmediata realmisión" de Pepe El Ferreiro.

Na esposición de motivos, el PP señala que'l xulgáu de lo Social númberu 2 d'Avilés dictó una sentencia pola que se declara improcedente’l despidu d'El Ferreiro. Según, el PP, la decisión xudicial punxo de manifiestu la illegalidá cometida". "Lo realmente importante ye devolvelu a la direición del muséu, un centru qu'esiste gracies a el so trabayu y obra personal", señalen dende la oposición.
  
D'esta forma, el despidu de Pepe El Ferreiro volverá ser motivu d'alderique na Xunta Xeneral del Principáu d'Asturies. La última vegada foi nel Plenu del pasáu 27 de mayu, con una interpelación del diputáu del PP Alfonso Román López a la conseyera de Cultura y Turismu del Principáu, Mercedes Álvarez, que señaló que de les cuatro coses que pidía El Ferreiro al denunciar, el xuez dio la razón al Principáu en tres.

Esplicó asina la “satisfaición" de la Conseyería pola resolución xudicial porque establez que Naveiras yera'l direutor del Muséu y que yera un altu cargu. Amás, Mercedes Álvarez dixo que la sentencia señala que la xestión d'El Ferreiro funcionaba "d'una forma non ortodoxa". Mientres, Alfonso Román López dixo nesi Plenu que la conseyera facía'l ridículu al sacar pechu sobre una sentencia qu'estableciera que'l despidu yera improcedente.