CC.OO yá prepara la convocatoria d'una fuelga xeneral

CC.OO punxó en marcha esti vienres los preparativos pa la convocatoria d'una fuelga xeneral nel Estáu, al considerar qu'ésta "paez inevitable", según anunció'l sindicatu.

"Lo que fiximos foi poner la maquinaria en marcha por si tenemos que convocar la fuelga xeneral, pa que too tea engrasao", esplicó, en declaraciones a Europa Press, el responsable de Comunicación de CC.OO., Fernando Lezcano.

La organización dirixida por Ignacio Fernández Toxo celebró ayeri en Madrid dos reuniones plenaries de carácter estraordinariu pa entamar dichos preparativos, a les qu'asistieron unes 150 persones.
  
El sindicatu, que nun precisó la fecha que s'embaraxa pa la fuelga xeneral, xustifica la posibilidá de dir a esta movilización pol conteníu del plan antidéficit, que considera "inxustu, desequilibráu y antieconómicu", asina como por dellos conteníos que se van conociendo de la reforma llaboral".
  
Hasta agora, tescendió que'l decretu que va llevar el Gobiernu al Conseyu de Ministros del próximu día 16 podría incluyir la estensión del contratu indefiníu con despidu de 33 díes, asina como facilitar los despidos nes empreses qu'afirmen tar travesando una mala situación económica, supuestu nel que se consideraríen procedentes y la indemnización baxaríase a 20 díes.
  
Lezcano piensa que'l Gobiernu ta "escuchando más pela oreya derecha que pela izquierda" al nun atender les reivindicaciones sindicales d'evitar l'abaratamientu del despidu y facer casu de lo que demanden los empresarios pa la reforma del mercáu llaboral.
  
El responsable de Comunicación de CC.OO. considera que lo que se va conociendo de la reforma y el fechu de que se punxera una fecha p'aprobala con o sin acuerdu pue llevar a pensar a la CEOE "que-y va a ser más fácil" asumir el conteníu del decretu del Gobiernu que lo que resultaría d'una negociación na que los empresarios tendríen que realizar esfuerzos pa llegar a un acuerdu.
 
Campaña d'información social
  
CC.OO. va poner en marcha una campaña d'información paciente, razonada y intensiva" pa esplicar nos centros de trabayu y a la sociedá les razones de la güelga.
  
Nes sos xuntes de güei, los responsables de CC.OO. acordaron tamién ratificar la estratexa de movilización unitaria  al par d'UXT y desarrollar un plan organizativu pa facer llegar a los afiliaos y a tolos centros de trabayu l'analís y les alternatives del sindicatu.
 
Sesta fuelga de la democracia
  
De materializase, lo que paez más que probable, ésta sería la sesta fuelga xeneral de la democracia y la quinta que se-y fairía a un Gobiernu socialista.
  
El primer paru xeneral de la historia democrática española, convocáu en solitariu por CC.OO., tuvo llugar el 20 de xunu de 1985 contra'l recorte de les pensiones de xubilación aprobáu pol Gobiernu de Felipe González.
  
La segunda fuelga xeneral, que paralizó l'Estáu, convocáronla CC.OO. y UXT el 14 d'avientu de 1988 pa protestar contra l'abaratamientu del despidu y la xeneralización de los contratos 'basura' pa los mozos. Tres l'ésitu d'esta convocatoria, l'Executivu de Felipe González retiró la reforma prevista y elevó'l gastu social.
  
CC.OO. y UXT fixéron-y dos güelges más a Felipe González: una de media xornada'l 20 de mayu de 1992 pol recorte de les prestaciones por desempléu, y otra de 24 hores el 27 de xineru de 1994 contra la reforma llaboral diseñada pol Gobiernu.
  
La quinta foi'l 20 de xunu del 2002 contra un Gobiernu del PP. José María Aznar, que llegó al poder en 1996, aprobó'l llamáu 'decretazu', pol que se modificó la cobertoria a los paraos y se reduxeron los costos del despidu pente medies de la eliminación de los xornales de tramitación. La norma cambióse parcialmente mientres el so pasu pol Congresu unos meses dempués de la fuelga.