Greenpeace va tar presente na concentración contra la incineradora

Una representación de Greenpeace va acudir el domingu día 6 de xunu a les 12.30 hores a la concentración que va tener llugar en Xixón contra la incineradora.

Na concentración repartirá lleche "ensin dioxines procedente de les vaques de la área onde'l Gobiernu asturianu pretende construyir una gran incineradora de residuos sólidos urbanos. "Esta lleche natural y tovía llibre de sustances contaminantes y perxudiciales pa la salú demuestra qu'otru desarrollu ye posible pa la zona", dixeron dende Greenpeace, añadiendo que si a lo último los políticos del Principáu apuesten por una planta pa quemar residuos n'Asturies "van causar un dañu irreparable a la economía tradicional del llugar poniendo en serio peligru la salú y el mediu ambiente".
  
Recordaron que nun radiu de 15 kilómetros sobre la futura planta incineradora viven 800.000 persones y esisten 500 esplotaciones ganaderes. "Ye un actu irresponsable per parte del Gobiernu asturianu apostar por una incineradora sabiendo qu'esiste un ampliu refugu social a la mesma, que ye'l sistema más caru y que menos empléu xenera, amás de ser nociva pa la salú y el mediu ambiente ¿Cuántos argumentos más precisen los políticos pa refugar frontalmente proyectos como esti más propios del sieglu pasáu?", declaró Julio Barea, responsable de la campaña de contaminación de Greenpeace.