Denuncia que la inspección nun permite impartir asturianu n'Infantil

|

Un maestru denunció qu'Inspección Educativa nun-y permite al so centru implantar asturianu n'Infantil, basándose en que la mesma nun ta dientro del Currículu pa esti nivel.

El docente del Colexu Públicu Elena Sánchez Tamargo de La Pola Llaviana, recordó que'l propiu Tribunal Superior de Xusticia d'Asturies refugó un recursu del sindicatu Suatea contra esti currículu por esti asuntu, señalando la resolución que la llingua taba incluyida dientro del conceptu cultura asturiana.
  
Nel actu d'entrega de los premios lliterarios de l'Academia de la Llingua, Xulio Llaneza Fernández, galardonáu nel Concursu de Recoyida oral de Léxicu, aprovechó la so intervención pa criticar esta situación. Posteriormente, en declaraciones a Europa Press, confirmó que "un día llegó la direutora esplicando que la inspectora díxo-y que nun se pue dar al asturianu n'Infantil porque nun ta nel currículu".
  
Según el maestru, fuere la propia direIción del centru la que plantegara la propuesta, defendida por un grupu de profesores. "Tamos dando asturianu con una buena aceptación en primaria, con sobre'l 70% d'alumnos que lu escueyen", esplicó Llaneza. "Pensamos na posibilidá d'empezar n'Infantil, porque tenemos profesores titulaos, con una interina a tiempu completu, y unos cuantos más fixos que tenemos la capacitación", añadió. Confirmó que l'equipu direUtivu "yera favoratible a ello, y sabemos qu'hai otros sitios n'Asturies onde yá lo dan".
  
Nesti últimu casu, afirma que la esplicación de la inspección ye que nesos centros yá se daba asturianu n'infantil enantes del actual currículu, polo que decidió nun quitase l'asignatura.
  
Pal maestru, la postura de la direición nun tien "nin pies nin cabeza". Recordó asina l'episodiu del recursu del sindicatu Suatea. La organización alegó al Tribunal Superior de Xusticia d'Asturies contra esti currículu, precisamente por nun incluyir una mención espresa a la Llingua Asturiana, y namás referise a la Cultura Asturiana. El TSXA refugó'l currículu plantegando que la Llingua Asturiana yá ta incluyida dientro del conceptu Cultura Asturiana. "Sicasí, na práutica esto nun s'aplica", protestó'l docente, que considera la situación "una discriminación inxusta".
  
Llaneza informó que dende'l centru punxeron el casu en conocimientu de los sindicatos y que, polo menos Suatea yá ta tratándolu, lo mesmo cola inspección que cola propia Conseyería d'Educación. La intención del centru yera entamar a impartir llingua asturiana nel próximu cursu 2010-2011.

Contador Estadistiques