Recoyer la tradición oral enantes de que nun queden informantes

Los premiaos nos Concursos de l’ALLA 2010 nes estayes de recoyida de material oral fixeron un llamáu “urxente” énte la posibilidá de que dientro d’unos años nun queden informantes.

El premiáu nel Concursu d’Investigación de Recoyida de Material toponímico oral, Antonio Alonso de la Torre, col trabayu ‘Toponimia de la parroquia de Caranga (Proaza)’, fecho a comuña con Francisa Iglesias Álvarez, dixo que cada vez ye más difícil topar informantes, polo que yera urxente recuperar la tradición oral asturiana, “ye un llabor prestoso, pero tamien señardoso”.

Mientres, Francisco Javier Redondas Maseda, ganador d’un accésit na mesma categoría pol trabayu ‘Toponimia de la parroquia de Trabáu (Degaña)’, recordó les pallabres de María, una de les sos informantes; “si vienes dientro d’unos años nun va haber naide que te diga los nomes d’estos sitios, van perdese”.

Del mesmu sentir foi la ganadora del segundu accésit, María Aurina González por ‘Topinimia de la parroquia de Llabra (Cangues d’Onis)', anque apuntó que recoyer la toponimia ye un llabor difícil “ye una collecha pa recoyer nun futuru cuentos y otros materiales”.

Nesti mesmu apartáu tamién resultó ganador ‘Toponimia de la parroquía de Llabares (Santu Adrianu)’ y ‘Toponimia de la parroquía de Villanueva (Santu Adrianu)’, de les que ye autor Jesús Javier Fernández.

No que cinca a la recoyida oral de léxicu, Xulio Llaneza, ganador con ‘Léxicu del Valle de Santa Bárbola (SMRA), indicó que tamién ye un trabayu urxente y que merez la pena siguir investigando “pa que nun se pierda y poder enseñalo a los demás”.

Mientres que l’autor de ‘Vocabulario de Ruenes (Peñamellera)’, Ramón Rodríguez Corao, ganador d’un accésit, dixo que los informantes diben morriendo y con ellos tola información oral. Al empar, Xuan Santori y Juan Vicente Inguazo foron premiaos con otru accésit por ‘Un palabreru cabraliegu’.

La presidenta de l’Academia de la Llingua, Ana María Cano, quixo aselar a los premiaos y recordar que “anque entá hai muncho por facer, dende qu’entamó la filloxía asturiana con Menéndez Pidal, yá se ta diciendo que l’asturianu ta morriendo”.

“L’asturianu sigui calteniéndose y hai qu’enfotase en buscar bonos informantes, confió en que la llingua nun muerra, sinón que taríamos faciendo nós equí”, solliñó Cano. Poro, encamentó a “peñar Asturies pueblu a pueblu” pa recuperar tol léxicu asturianu.

Obra emblemática medieval

No que cinca al premiu d’investigación llingüística, l’ALLA premió’l llabor de Pablo Suárez, pol trabayu tituláu ‘Una torna al asturianu, íntegra y crítica de Tirant lo Blanch dende l’orixinal valencianu de 1490’. Ana Cano emponderó’l llabor de traducir esta obra de más de 800 fueyes, a la que calificó como “obra emblemática de la lliteratura medieval”.

Cine n’asturianu

El ganador del concursu de curtios, Pablo Quiroga Prendes por ‘Bisarmes’, reseñó qu’anguaño la producción cinematográfica n’asturianu ye percurtia, “dellos autores foron dexando de llau la nuesa llingua énte la falta de concursos y d’un llugar onde amosalos”.

Al empar, Quiroga encamentó a l’Academia a abrir la convocatoria audiovisual a los documentales, “si los informantes tán morriendo sedría bono ponelos delantre d’una cámara pa que nun se pierda". La presidenta de l’ALLA comprometiese a tresmitir a la institución esi pidimientu pa les próximes ediciones.

2ª guerra mundial n’asturianu

‘L’internu’ foi la obra ganadora col premiu de teatru. Nella, Pablo Rodríguez Alonso, que foi redactor d’Asturies.com, cunta’l diálogu tráxicu ente un carceleru y el so internu mientres la 2ª Guerra Mundial, un tema nun tratáu hasta la fecha na lliteratura asturiana.

Nueve concursos y dos ermos

L’Academia de la Llingua Asturiana entregó un total de nueve premios.Amás de los citaos, entregáronse los premios de los Concursos de llectures pa rapazos (‘La maldición de Llucescuna’ d’Abel Martínez González y ‘Xaime Bon y el casu de la corona preciosa’ d’Enrique Carballeira Melendi); de creación lliteraria ‘Llorienzu Novo Mier’ (‘Nos díes pensatibles’ de Ricardo Candás); de recoyida de material lliterariu escrito ‘Federico Fierro Botas’ (‘Obra manuscrita de Pachín de Melás’ de Ramiro y Clara Gonzalez Delgado, y ‘Yo quixera cantate y otros poemes llangreanos’ d’Inaciu Galán); y de cómics n’asturianu (‘De la materia de los suaños’ de Manuel Antonio García). Mientres que los premios d’investigación sobre lliteratura asturiana y de recoyida de material lliterariu oral quedaron ermos.