El PKK da por acabáu l'altu'l fueu coles fuerces turques

|

El Partíu de los Trabayadores del Kurdistán (PKK), milicia qu'opera nel norte d'Iraq, anunció'l fin del altu'l fueu que caltenía dende hacia un añu coles fuerces turques.

"Decidimos romper l'altu'l fueu unillateral con Turquía qu'anunciamos n'abril del añu pasáu", indicó'l so voceru Ahmed Danees, en declaraciones a Reuters. "Hai dos díes, empezamos a cometer ataques contra l'Exércitu turcu en respuesta a los repitíos ataques militares contra'l partíu y a los ataques políticos contra los kurdos en Turquía", añadió.

El voceru del PKK culpó d'esta decisión a la falta de meyores del paquete de reformes anunciáu l'añu pasáu por Ankara y a les últimes operaciones militares turques nel norte d'Iraq, nes que s'atacaron cerca d'un centenar d'oxetivos milicianos. Según datos oficiales, mayu foi'l mes más mortíferu pa les tropes turques, con 23 soldaos muertos y 33 firíos.
  
Más de 40.000 persones, na so mayoría d'orixe kurdu, morrieron dende que'l PKK se llevantare n'armes contra Turquía nel añu 1984, fecha na qu'elevó la so reivindicación d'un Estáu independiente. Los rebeldes reclamen agora derechos y autonomía pa los sobre 15 millones de kurdos que se calcula viven en Turquía.

Contador Estadistiques