La Sociedá Rexonal de Turismu fai un apueste pol Muséu de Grandas

La Xerente de la Sociedá, Noelia Menéndez, dixo que’l Muséu Etnográficu de Grandas va ser un de los equipamientos culturales de cabecera na nueva estratexa turística.

Menéndez realizó ayeri xueves una visita al Muséu Etnográficu de Grandas de Salime, acompañada del Direutor del Muséu, Francisco Cuesta. La Xerente de la Sociedá Rexonal de Turismu aseguró que, una vegada consolidáu como centru etnográficu de primer orde, “entamóse una nueva etapa baxu la batuta del so nuevu Direutor, que se caracteriza pol trabayu na profesionalización del personal, del serviciu y de tol muséu, pa dar una imaxe de conexón col restu d'instalaciones culturales asturianes, calteniendo l'espíritu tradicional del llugar al traviés de les sos esposiciones habituales, y añadiendo nuevos elementos”.

Mientres, el Direutor del Muséu anunció que van inaugurase nueves instalaciones, como una fábrica de gaseosa y un cabazu, amás d'ameyorar dellos conteníos espositivos. Amás, otru de los oxetivos primordiales ye llograr la modernización de la xestión. Pa ello, y en collaboración cola Sociedá Rexonal de Turismu, van modificar la páxina web p'ameyorar la promoción turística del equipamientu y les sos actividaes, van instalase cartelos y miniguíes esplicatives de les esposiciones, y van estudiase les formes de supresión de barreres arquitectóniques pa crear un espaciu más accesible.

Nesti sentíu, Noelia Menéndez anunció que'l Muséu va convertise n'unu de los equipamientos culturales de cabecera nel Occidente d'Asturies y un referente etnográficu del país dientro de la nueva estratexa de promoción turística que ta diseñando la Sociedá.