“La lliteratura n’asturianu ye un milagru del que sentinos arguyosos”

“El milagru de la lliteratura n’asturianu ye d’un valir inestimable p’Asturies, amás ye un patrimoniu vivu del que podemos sentinos arguyosos” dixo ayeri Mercedes Álvarez.

La Conseyera de Cultura dixo estes pallabres en Xixón, mientres la presentación de l’antoloxía de poesía n’asturianu ‘Toma de Tierra’, publicada por Trea y coordinada por José Luis Argüelles. Amás de la miembru del Executivu y el propiu autor, taben na presentación Leopoldo Sánchez Torre, profesor de la Universidá d’Uviéu, y Álvaro Díaz Huici, direutor de la editorial Trea.

“Dende fai sieglos y de manera ininterrumpida hubo siempre escritores qu’emplegaron l’asturianu nes sos obres. Como en cualesquier lliteratura húbolos bonos, menos bonos y, dende llueu, escelentes, como Acebal, Fernán Coronas o Pín de Pría”, solliñó Álvarez. Sobre’l momentu actual dixo que la lliteratura del país vive un bon momentu, “enxamás hubo tantos escritores n’asturianu y con voluntá d’ello”

La Conseyera afirmó que hai xente que fala del milagru de la lliteratura n’asturianu “y nun ye nenguna esaxeración”. Asina, dixo que la poesía na nuesa llingua vive un momentu d’esplendor con una calidá que resiste la comparación con cualesquier otra poesía.

En nome del Principáu quixo animar a tolos escritores que “construyen esa gran riqueza” y que conformen “el gran corpus de la lliteratura asturiana” a siguir escribiendo, “sois presencia viva de la cultura asturiana”, resaltó. Amás, afitó’l compromisu de la so Conseyería cola literatura n’asturianu sofitando la publicación d’obres, la torna a otres llingües y convocando añalmente los premios lliterarios.

Del mesmu mou, recordó que la obra presentada, ‘Toma de Tierra’, supón un encontu pa que fuera de les llendes d’Asturies conozan la poesía que se fai nel idioma propiu. “Al llector n’español va sorprende-y la calidá, matices y rexistros de la nuesa poesía”, apuntó la Conseyera. Tamién destacó qu’anque l’antoloxía presentada nun ye la primera que se fai sobre poesía asturiana, si ye la más importante hasta la fecha.

La mayor antoloxía hasta la fecha

‘Toma de Tierra’ recueye una antoloxía de poesía de38 autores qu’espublizaron ente 1975 y 2010 y según los autores y editores quier averar la poesía n’asturianu a los llectores d’acullá de Payares, “onde ye desconocida y poco tenida en cuenta, siendo la manifestación más importante del Surdimientu”, en pallabres del propiu autor, José Luis Argüelles.

Del mesmu mou, Leopoldo Sánchez Torre, que reseñando dalgunos versos de Concha Quintana y Manuel Asur dixo les úniques pallabres que se sintieron n’asturianu nel actu, afirmó que los escritores n’asturianu fixeron un llabor perimportante pa la cultura asturiana, “tán alzando una patria, que ye la llingua asturiana”.

Al empar, Torre recordó que col asturianu, “una llingua que sigue viva pese a too”, tabamos nel derechu d’esixir más, “pero hai qu’agradece-y a la Conseyería de Cultura ser una de les instituciones que más fixeron pola lliteratura n’asturianu”.