Los ecoloxistes afirmen que la bandera azul nun reflexa la realidá

Tres qu’Asturies algamara’l so record de banderes azules, la Coordinadora Ecoloxista diz que queda demostráu qu’ésti ye un símbolu que nun reconoz la realidá ambiental de la mariña.

La Bandera Azul ye un distintivu qu'otorga añalmente la Fundación Europea d'Educación Ambiental (FEE) a les sableres y puertos que cumplen una serie de condiciones ambientales ya instalaciones. Ayeri 2 de xunu, l'Asociación d'Educación Ambiental y del Consumidor (ADEAC) representante n'España del  Programa Bandera Azul, comunicaba la rellación de sableres y puertos que consiguieron esti galardón pa la temporada 2010, aumentando Asturies de 11 sableres nel 2009 a 19 nel 2010.

“Lo primero que nos resulta sorprendente ye que se privatizara la verificación del estáu ambiental de los arenales a una entidá privada de la que se conoz poco más que dar estos conocíos galardones”, señalen los ecoloxistes.

Una de les prioridaes a la hora d’algamar la bandera azul ye la calidá del agua, “el Principáu realiza esti analís con una técnica particular que consigue que casi toles nueses sableres presenten un estáu óptimu de les agües, a pesar de que tenemos en tolos conceyos graves problemes de vertíos”, indiquen los ecoloxistes.

Asina, recuerden que la Comisión Europea sancionó al Conceyu de Xixón, o que’l Ministeriu de Mediu Ambiente ta faciendo nueves depuradores en Posada de Llanes pa la zona occidental, o construyendo un emisariu pa evitar los vertíos de la depuradora d'Avilés. Amás, falen de los proyeutos del Principáu p'ampliar y facer depuradores en tola mariña.

Los ecoloxistes recuerden que n'Asturies nun hai nengún programa d'educación ambiental nes sableres, ún de los criterios usaos pa conceder la bandera azul. “Somos la única comunidá española que por non tener nun tien nin centru d'Educación Ambiental”, solliñen.

Otru pilar ye la xestión ambiental, tener una redolada curiada y llimpia. Cosa que pa los ecoloxistes nun cumplen sableres como Salinas, que ta n’obres, o Lluanco, col puertu tamién n’obres.

 “Al nuesu xuiciu y contra lo que güei dicen los alcaldes asturianos de los conceyos que recibieron el distintivu, la bandera azul nun reconoz la realidá ambiental de la mariña asturiana”, señalen pa finar.