L’asturianismu anima a participar na concentración contra la incineradora

El Bloque por Asturies y Unidá Nacionalista Asturiana animen a participar na concentración del Conceyu Escontra la Incineración y la Plataforma de Ganaderos y Afeutaos.

La concentración va llevase a cabu'l próximu domingu 6 de xunu, a les 12.30 hores na Plaza del Náuticu, en Xixón, y quier facer un llamáu a les autoridaes pa que nun se faiga la incineradora de residuos domésticos que cuenta llevantar Coxersa nes sos instalaciones de Serín. Un actu que s’enmarca dientro de la Selmana del Mediuambiente.
.
El Bloque por Asturies considera que la incineradora ye nociva pa la salú y que tamién va afeutar al bolsu de los ciudadanos, “la so construcción y funcionamientu va facer aumentar les tases nun 600%.
 
La organización afirma que Coxersa nun cumplió coles polítiques de reciclaxe, “exemplu d'ello ye que por normativa debería reciclase ente un mínimu del 55% y un máximu del 80%, sicasí na actualidá namás reciclen el 11%”.

El Bloque diz qu'apostando por polítiques de reciclaxe, amás de contribuyir a la sostenibilidá del mediu ambiente, xeneraríase más emplegu, “al empar que los conceyos, aplicando'l sistema puerta a puerta, podríen cobrar pol recicláu, ingresando asina más dineru a les arques municipales, en cuenta de desembolsalo”.

UNA califica d’antidemocráticu’l procesu

Unidá Nacionalista Asturiana tamién va súmase a la concentración convocada pal domingu. En palabres del voceru de la Estaya de Mediuambiente, Tino Fernández, "la incineradora ye una pésima noticia p’Asturies, porque los riesgos de la incineración son inasumibles”.

Del mesmu mou, diz que "l'alderique democráticu rellumó pola so ausencia en tanto que l'aprobación del proyeutu fíxose ensin un estudiu seriu d'alternatives y ensin informar d'elles a la ciudadanía y al traviés d'un organismu con una escasa llexitimación democrática como ye Coxersa”.

D'esta miente UNA vien de roblar la ‘Declaración contra la Incineración y en pro d'un pautu sociopolíticu pa la xestión sostenible de los residuos".