Retrasen les sanciones a les empreses que nun usen el vascu

El Gobiernu vascu va retrasar l'aplicación de sanciones a los comercios afeutaos pol Decretu qu'obliga a usar el vascu nes empreses "hasta que la realidá sociollingüística lo aconseye".

Esti decretu sobre los derechos llingüísticos de les persones consumidores y usuaries, aprobáu en xunetu del 2008 pol gobiernu de Juan José Ibarretxe, establez una serie d'obligaciones llingüístiques pa determinaes empreses  -en función del so tamañu o allugamientu, ente otros factores-, como la necesidá de que parte del so personal tea capacitáu p'atender en vascu y castellán o d'incluyir ambes llingües oficiales na so rotulación.

El decretu otorgaba un plazu de dos años p'adautase a la normativa, que va acabar el próximu 17 de xunetu. Na pasada llexislatura, el PSE-EE y el PP pronunciáronse en contra de los conteníos de la norma referíos a les obligaciones llingüístiques y a les sanciones qu'imponía.
  
Pela so parte, el parlamentariu d'UPyD, Gorka Maneiro, presentó ayeri una proposición non de llei na qu'encamienta al Gobiernu vascu qu'adopte les midíes y actuaciones necesaries pa procoder a la "inmediata" derogación del decretu, al considerar que "supón una intolerable inxerencia del Estáu nel ámbitu priváu de les persones".
  
L'Executivu autonómicu, al traviés d'un comunicáu, mostró la so intención de "establecer los mecanismos llegales apropiaos pa que el aspecu sancionador del Decretu sobre los derechos llingüísticos de les persones consumidores y usuaries nun tuviera repercusiones sobre les empreses, entidaes y establecimientos abiertos al públicu a los que se fai referencia en dicha norma".
  
El Gobiernu afirmó que, al traviés del Departamentu de Sanidá y Consumu y del Departamentu de Cultura, "vino trabayando na busca de la solución llegal más apropioada pa retrasar l'aplicación de les sanciones hasta que la realidá sociollingüística lo aconseye".
  
Con esi oxetivu, va proceder a modificar el Decretu sobre los derechos llingüísticos de les persones consumidores y usuaries aprobáu nel 2008. "Foi y ye intención d'esti Gobiernu caltener el so apoyu a cuantes midíes contribuyan al fomentu del usu del eusquera en tolos ámbitos de la nuesa sociedá, siempre dende'l puntu de vista del acuerdu, buscando l'adhesión de la ciudadanía dende la persuasión y non dende la imposición", añadió l'Executivu.