Minke, Watkins y Julius, Premiu Príncipe d'Asturies d'Investigación

La candidatura de los neurobiólogos estaoxunidenses David Julius, Llinda Watkins y l'israelín Baruch Minke resultó galardonada col Príncipe d'Investigación Científica y Técnica.

El Xuráu del Premiu Príncipe d'Asturies de la Investigación Científica y Técnica 2010 reconoció güei que los tres ficieron descubrimientos que en conxunto permiten una comprensión más fonda de les bases celular y molecular de les distintes sensaciones,  especialmente la del dolor.
  
David Julius ye pioneru nel analís molecular de los nociceptores, identificando'l TRPV1 como receptor neuronal d'estímulos nocivos; Llinda Watkins descubrió la participación de les célules gliales nos mecanismos del dolor patolóxicu y Baruch Minke caracterizó les canales TRP, base de la percepción y señalización sensorial.
  
Les sos investigaciones identifiquen dianes moleculares a les que dirixir una nueva xeneración de melecines específiques pal tratamientu selectivu de distintos tipos de dolor, especialmente'l crónicu. Ello abre víes esperanzadores pa eliminarr un mal qu'afecta a la calidá de vida de millones de persones y que foi, dende siempre, ún de los grandes retos a los que s'enfrentó la melecina.