Más de 100 persones yá confirmaron la so asistencia a la UABRA

ALLA, Universidá y Conceyu de Cangas del Narcea vienen de roblar el pautu de collaboración pol que ñaz la UABRA, a la que yá s’apuntaron más de 100 persones.

Esti alcuerdu, robláu gúei, 1 de xunu, dexa afitao que Cangas del Narcea va ser dende agostu d’esti mesmu añu sede permanente de los cursos y actividaes de la Universidá Asturiana de Branu.

A lo llargo de la primera quincena del mes d’agostu les instalaciones de la Escuela Hogar, Casa de la Cultura, Institutu d’Educación Secundaria y Teatru Conde Toreno acoyerán el programa diseñáu pola UABRA nel que destaca un ambiciosu programa formativu (investigación filolóxica, estudiu de la realidá social y cultural asturiana y capacitación llingüística), asina como otres xeres  d’espardimientu social de la cultura, la ciencia y l’arte asturianu.

Amás de los cursos d’asturianu (nivel básicu y avanzáu) y de gallego-asturianu (qu’esti añu ta na segunda fase), la UABRA plantega pal presente añu cursos de traducción, internet, lliteratura, hestoria o llocución periodística, ente otros.

El cursu de traducción al asturianu ta empobináu por Xosé Lluis García Arias, y tamién participen como profesores Ana Cano y Xosé Antón González Riaño. El cursu quier presentar sintéticamente los presupuestos teóricos que rixen la traducción a una llingua minoritaria.

Mientres que ‘Internet y asturianu: aplicaciones socio-educatives’, quier averar al profesoráu d’asturianu a los recursos qu’ufre la rede pal deprendizax oral y escritu del idioma del país. El so coordinador ye David Guardado Díez, participen tamién como profesores Xulio Berros y Xabiel García Pañeda.

Los cantares, bailles ya instrumentos musicales asturianos tamién tienen el so espaciu na UABRA, de la mano de Xuacu Amieva, con un cursu nel que quier afondase nel conocimientu de los cantares, bailles ya instrumentos populares dende la perspeutiva de la so presencia na escuela. Participen como profesores Xosé Antón Fernández ‘Ambás’, Maribel Parrongo y Covadonga Muñíz.

Esti añu tamién hai un cursu dirixíu a los periodistes col que se quier facer un averamientu a la llocución en llingua asturiana. Dirixíu por Prospero Morán, cuntará con Cristobal Ruitiña, Rubén Martín-Llames y Sonia Avellaneda como maestros.

‘La lliteratura asturiana nel aula d’Educación Primaria’ ye’l cursu empobináu por Iris Díaz Trancho, cuntando con Pablo Rodríguez Medina y Xandru Armesto como profesores. Esti cursu quier analizar les posibilidaes de la lliteratura xuvenil nes clases y va cuntar con delles actividaes de calter complementariu.

La investigación dialeutal, toponímica y de tradición oral va tar en Cangas del Narcea de la mano de Xosé Lluis García Arias, amás de la participación d’Ana Cano, Iván Huerga, Héctor Xil y González Riaño. Al traviés d’esti cursu quieren afondar nes téuniques rellacionaes colos trabayos de campu, encuestación y primeros pasos na investigación y descripción llingüística, na toponímica y na  lliteratura oral.

Pa finar, habrá un cursu d’entamu a la investigación hestórica de la lingua asturiana. Coordináu pola presidenta de l’Academia, Ana Cano, y dirixíu a estudiantes y llicenciaos en Filoloxía a los que-yos pruya afondar na conocencia de la hestoria de la llingua y les carauterístiques del actual procesu de normalización.

Los estremaos cursos y actividaes desarrollaránse na villa canguesa del 2 al 13 d’agostu y, hasta esti momentu, a los que confirmaren la so asistencia más d’un centenar de persones. El plazu de matrícula fina’l próximu vienres, día 4 de xunu.