Héctor Pérez y Xurde Fernández espublicen nuevos llibros

El 1 de xunu llega a les llibreríes ‘Ucrania y otros nomes de muyer’ de Xurde Fernández y ‘Desinencies’ d’Héctor Pérez, dos títulos nuevos de la colección de narrativa breve d’Ámbitu.

Los llibros, entrambos los dos de  rellatos curtios, son parte de la colección de narrativa breve de la editorial y onde yá publicaron, ente otros, autores de la talla de Berta Piñán, Vanessa Gutiérrez, Xuan Bello, Antón García, Xandru Fernández o Pablo Antón Marín Estrada. Asina, súmense Xurde Fernández  (Candás, Carreño, 1975), y Héctor Pérez Iglesias (Arlós, Llanera, 1978), a la colección.
 
Ucrania y otros nomes de muyer

‘Ucrania y otros nomes de muyer’ ye’l quintu llibru del candasín Xurde Fernández y el terceru de rellatos, depués de ‘Volver’ (Ámbitu, 2007) y ‘Díes d’iviernu’, col que ganó’l premiu Llorienzu Novo Mier, de l’Academia de la Llingua Asturiana, nel 2008. Dientro de la so obra lliteraria cuéntense tamién les noveles ‘El color del escaezu, escritu a comuña con Marián García, y ‘Volver.’

Ucrania ye un país. Un país que tien un nome, que ta habitáu por xente amigo, y otro non tanto, que tien una historia y, seguramente, un futuru. Eso ye Ucrania y otros nomes de muyer. Países de los que conocemos fechos trescendentales que cambien el rumbu de les trayectories vitales pa siempre. Hai un momentu nel que dalgo o daquién ruempe. Esa xente, lo que protagonizó’l socedíu, dacuando nun se da cuenta nesi instante de que too cambió, de que va cambiar y nada va volver a ser como enantes. Pero pasa.

Estes xeografíes con nome femenín constrúinse nun mapa trazáu d’esperances, soledaes, trabayu, frustración, dolor y rellumos de felicidá. Son vides de muyeres. Muyeres qu’avecen a ser complementos circunstanciales del rellatu principal y que nesta ocasión, dende’l so destierru involuntariu de les coses importantes, enséñennos les coses que realmente tienen importancia. Trátase de vivir y facelo caúna lo meyor que pue colo que-y tocó en suerte o en desgracia.

Desinencies

Héctor Pérez Iglesias axunta en Desinencies una escoyeta de quince cuentos escritos nestos últimos años. Nellos rescampla la vocación d’atopar la palabra bien dicha y trazar histories onde s’aldovinen esperiencies vivíes y sentíes nun mundu rural que l’autor conoz bien. N’otros rellatos, Pérez Iglesias adiéntrase nos territorios de la ficción más imaxinativa, dende la lleenda hasta les histories de carácter fantásticu. Nestos testos, l’escritor, una de les promeses más sólides de la lliteratura asturiana, xuega coles formes y los xéneros pa dar acoyida al humor, l’esperimentalismu o la narración infantil.

‘Desinencies’ supón, amás, la estrena na prosa d’un autor qu’hasta agora yá llamara l’atención pol so dominiu del llinguaxe poéticu —bien presente polo demás en munchos d’estos rellatos—, que yá-y valió premios tan prestixosos como’l Teodoro Cuesta, col poemariu ‘Como crecieres tu’, el Fernán Coronas, por ‘Lo peor del bon tiempu’, o’l Nené Losada Rico. Con ‘Desinencies’, Pérez Iglesias confírmase como ún de los valores más firmes d’una xeneración nueva que ta pidiendo pasu nel panorama de les lletres asturianes.